"Governu Austrália ajuda purvolta tokon $2.3 mai atu haree ba infrastrutura no ekipamentu. agora sira sei haree hela, maibé atu droop mai mak seidauk", dehan Ministru Saúde Interinu (MS), Bonifácio Maucoli, iha Salaun Edifísiu Ministériu Finansas Ai-Tarak Laran, Segunda (20/4).

Nia subliña, ajuda ne'ebé husi governu Australia mai Timor-Leste atu haree ba ekipamentu Covid-19, infraestrutura no treinamentu kapasitasaun ba profisionál saúde sira.

"Sira hakarak apoiu mai ita maka ekipamentu individuál no mós ekipamentu hanesan ventiladór, kama no mós extensaun ba laboratóriu nasionál atu bele garante ba teste iha laboratóriu nasionál", tenik nia.

Entertantu, ba ekipamentu hirak ne'e daudaun iha ona prosesu diskusaun entre Governu Austrália ho Governu Timor-Leste.