Deputadu Husu Fahe Fo’os, Akara: Governu Aprova Ona Apoiu Direitu ba Komunidade

SEKomS Mericio Juvinal dos Reis Akara ko'alia ba jornalista iha Parlamentu Nasional (21/4) SEKomS Mericio Juvinal dos Reis Akara ko'alia ba jornalista iha Parlamentu Nasional (21/4) Foto Isac Oliviera

Tempotimor (Dili)-Sekretariu Estadu Komunikasaun Sosial Mericio Juvinal Akara hatete, governu aprova ona apoiu direitu ba komunidade sira iha Timor laran tomak.

Akara hato'o deklarasaun ne'e relasiona ho ezijensia husi deputadu sira iha Parlamentu Nasionál ne'ebé husu atu governu fahe ona foos ba komunidade sira.

"Apoiu direitu mós ita aprova ona, agora deskute hela nia mekanizmu atu apoiu ne'e, tanba ita mós hakarak hanesan bee karik sulin to'o hotu, maibé ita mós lakohi par to'o iha dalan intupidu ka kanu ku'ak hodi sulin sai, hanesan lia-fuan kroat karik dehan 'labele ema seluk aproveita fali iha dalan ka naok'," dehan Akara ba deputadu sira iha plenaria PN, Tersa (21/04).

Entretantu, Deputadu bankada FRETILIN Alexandrino Cardoso da Cruz husu ba governu atu fahe ona nesesidade báziku hanesan fos no seluk tan ba povu kbiit laek sira.

Deputadu ne'e dehan, mosu preokupasaun husi komunidade balun relasiona ho planu governu atu extende estadu emerjensia ba loron 30 tan.

Nia hatete, implementasaun estadu emerjensia ne'ebé la'o daudauk ne'e seidauk to'o fulan ida, maibé komunidade balun halerik ona.

"EE seidauk kompleta fulan ida maibé ita-nia povu komesa halerik tiha ona kona-ba aihan, tanba ita-nia komunidade ne'ebé serbisu laiha atu sosa de'it foos saku tomak ida mós sira labele ona, entaun sira tenke sosa haknauk de'it," nia dehan.

Kona-ba extensaun ba EE, tuir nia, bele extende maibé governu presiza foti médida oinsa hodi rezolve povu nia halerik sira ne'e.

"Husu ba governu atu aselera polítika apoiu subsidiu ne'e, depois parte ministeriu relevante presiza serbisu hamutuk ho lojístika nasionál hodi distribui ona foos ba ita-nia povu kbiit laek sira," nia dehan.

Kona-ba subsidiu, deputadu ne'e fó ideia katak di'ak hapara subsidiu ba funsionariu sira no fó ba sira ne'ebé laiha serbisu.

 

Rate this item
(0 votes)
Last modified on Wednesday, 22 April 2020 20:08
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.