Deputadu Bankada FRETILIN, Dário Madeira hateten, sidadaun hotu-hotu hakarak ka lakohi tenke halo tuir regra Estadu Emerjénsia nian.
"Atu kombate Covid-19 ne'e meiu ne'ebé di'ak tebes mak ita implementa iha ita-nia nasaun ne'e," dehan nia, iha Plenária Parlamentu Nasionál, Tersa (21/4).
Nia afirma, bainhira la kumpre Timor Leste bele sai hanesan nasaun avansadu sira ne'ebé hetan atake Covid-19 ho númeru aas tebes.
"Agora daudaun ne'e buat ida distánsia sosiál ne'e atu la kumpre tiha de'it ona," dehan Dário.
Tuir nia observasaun, bainhira liu iha estrada boot kuaze ema barak mak forma arbiru iha banku sira.
"Ema barak mak ba forma rabat malu loos to'o hakuak malu tan, depois balun la tau tan maskra," nia dehan.
Iha fatin hanesan, Deputadu PLP, Francisco Vasconcelos husu governu atu aperta uitoan sidadaun sira ne'ebé lakohi obedese ne'e.
"Ai-moruk di'ak liu mak hela iha uma, distánsia sosiál, tanba ne'e governu presiza aperta ida ne'e labele halimar," nia dehan.
Reprezentante povu ne'e husu ba governu atu orienta Polisia Nasionál Timor Leste (PNTL) no FALINTIL-Forsa Defeza Timor Leste (F-FDTL) ne'ebé halo patrullamentu kontinua garante distánsia sosiál.
Entretantu, observasaun www.tempotimor.com iha terrenu, ema la'ós hobur de'it iha banku sira, maibé komunidade sira mós kontinua halibur malu iha bairru no mós iha merkadu sira. (*)