Karta  husi Xefe Estadu ne'ebé Tempo Timor asesu husi média sosiál, ohin loraik tuku 17:40, ho konteúdu husu  ba Prezidente Parlamentu Nasionál, atu estende tan Estadu Emerjénsia, to'o loron 26 fulan maiu 2020.

Xefe Estadu husu ne'e, hafoin reuniaun Konsellu Superior Defeza no Seguransa, no mos Konsellu Estadu,  ho unanimidade rekomenda hodi halo estensaun ba Estadu Emerjénsia. 

"Hanesan Prezidente Repúblika Ha'u husu disponibilidade  Prezidente Parlamentu Nasionál, atu fó autorizasaun hodi renova deklarasaun Estadu Emerjénsia iha territoriu Nasionál, ba tempu loron 30, hahú husi oras tuku 00:00 loron 27 fulan abril no termina iha oras tuku 11:59 ( kalan),loron 26 fulan maiu 2020", haktuir iha karta Ofisiál ne'e. 

Iha karta ne'e hateten, Prezidente Repúblika hala'o knaar tuir Konstituisaun, no mós valor sira inklui direitu  konstitusionál ne'ebé oras ne'e sai preokupasaun, ho ninia responsvel másimu no loloos maka, responsabilidade nasaun nian atu fo serteza kona-ba uzu forsa ne'ebé sertu  hatuur iha paragrafu g)  husi artigu 85 Konstituisaun Repúblika Demokratika Timor Leste.