"Governu aprova tiha apoiu ba empreza no traballadór sira, ne'ebé iha tempu badak ita sei hahú implementa. Ita husu atu oinsá apoiu 60% husi Estadu no 40% empreza na'in mak selu ba funsionáriu sira", dehan nia, iha edifísiu Ministeriu Finansas, Ai-Tarak Laran, Kuarta (22/4).
Governante ne'e afirma, apoiu ne'e Estadu halo atu empreza na'in sira labele hasai no demite funsionáriu durante periodu Estadu Emerjénsia nia-laran, no mós husu ba benefisiariu sira hotu-hotu tenke rejistu iha seguransa sosiál, iha Ministériu Solidariedade Sosiál no Inkluzaun (MSSI).
"Iha ekonomia intervensaun ne'ebe ita presiza halo iha prinsípiu importante ida mak tempu, entaun medida balun ita presiza halo agora maibé ninia benefisiu ne'e sei mosu iha futuru", tenik Fidelis.
Medida ne'e governu halo tanba empreza barak mak laiha kapasidade finanseiru, traballadór barak mak sei lakon nia servisu durante fulan hirak nia-laran no bele mós lakon servisu tinan ida nia-laran.
Nune'e, agora presiza halo intervensaun ba empreza sira atu bele augenta selu traballadór sira durante iha situasaun difisil ka periodu Estadu Emerjénsia nia-laran. (*)