Diretora Servisu Saúde Munisípiu Likisá, Apolónia dos Santos hateten, komunidade na'in 11 ne'e hasai amostra (sampel), tanba viziñu ho profesór portugueza sira, ne'ebe na'in rua pozitivu ona ba Covid-19.
"Horseik lokraik, husi ekipa laboratóriu nasionál mai hamutuk ho ekipa saúde Likisá hasai ona amostra komunidade na'in 11 ne'ebé uma na'in fó aluga ba malae sira ne'e no viziñu ho profesór portugueza sira ne'e nia sample atu halo teste," dehan nia, via telefone, Kinta (23/4).
Nia hatutan, ema sira ne'e deskonfia de'it mas durante ne'e sira la halo kontaktu direta ho malae sira no sira mós la hatudu sintoma ruma.
Komunidade ne'ebé foti ona amostra hodi lori ba teste iha laboratóriu nasionál no ba konfirma iha Darwin-Australia ne'e kompostu husi Mane na'in haat no feto na'in hitu.
Alende ne'e, mos tuir planu servisu Saude Munisípiu Likisá, sei foti komunidade Likisá to'o ema na'in 100 ninia amostra hodi halo teste para bele hatene loloos moras ne'e da'et ona iha Likisá laran ka lae.
"Atu halo medida prevensaun, foti amostra halo estudu see 100 pesoas ne'e mak ida pozitivu signifika Munisípiu Likisá ne'e risku ona ba Covid-19", tenik Apolónia.
Nia esplika, mekanizmu atu hasai komunidade sira-nia amostra ne'e iha oin rua. Ida ba ema balun ne'ebe mear no isin manas ba halo konsulta iha sentru saude. Seluk maka, husi ekipa laboratóriu Sentru Saúde Likisá nafatin kontinuasaun ba komunidade sira ne'ebe deskonfia kontaktu ho profesor portugueza sira ne'e nia uma.
"Agora daudauk sé mak ba konsulta iha moras isin manas, mear no inus been sira ne'e sei foti hotu to'o na'in 100 hanesan random hodi halo teste. See ida mak pozitivu Likisá risku boot", dehan nia. (*)