PM Taur dehan, governu deskute hotu ona kona-ba subsidiu ba povu no iha tempu badak sei informa ba povu TL tomak.

"Horseik lokraik mak ami foin diskuti hotu, kona-ba pakote tomak ne'e, kuandu aprova ona, naturalmente ministériu sira sei dezemina informasaun ba populasaun tomak par hatene intervensaun governu nian ne'e iha área saida-saida," dehan Taur iha Palásiu Prezidensiál Bairu-pite, Kinta (23/04).

Xefe Governu ne'e afirma, governu presiza duni oferese subsidiu no povu TL tomak tenke hetan.

"Ita tenke halo, ninia envargadura to'o iha ne'ebé, ne'e to'o momentu konkreta ami sei informa, mais halo ne'e ita tenke halo, par ajuda redus impaktu ekonomia ba ita-nia nasaun," dehan nia.

Entretantu, implementasaun estadu emerjensia fó impaktu negativu ba komunidade kbiit laek balun ne'ebé hahú hetan difikuldade atu atende sira-nia nesesidade uma laran.

Molok ne'e, deputadu husi Bankada FRETILIN Alexandrino Cardoso da Cruz dehan, nia simu informasaun katak komunidade balun hahú hamlaha ona.

Deputadu ne'e hatete, komunidade balun laiha ona serbisu tan ne'e sira laiha ona osan atu sosa hahaan.

"Sira sosa ho kada kilo de'it ne’e mós dezaraska," dehan nia.