Deklarasaun Assanami ne'e relasiona ho kritika balun husi públiku ne'ebé hatete katak, PN "dada" osan rihun $500 husi orsamentu Covid-19 hodi utiliza ba atividade deputadu sira-nian.
"Ema barak mós espalla (informasaun) osan rihun $500 ne’ebé mak aloka ba parlamentu, tanba Parlamentu hanesan orgaun ida ne’e atu hala'o atividade, osan ne'e iha fundu nune'e kuandu iha planu no serteza duni mak gasta, se laiha planu serteza osan ne’e nafatin iha fundu," dehan Assanami iha Sede PD, Kolmera, Sesta (24/04).
Tuir atual Prezidente PD ne'e, osan ne'e laos transfere ba PN atu uza fali ba per diem loron-loron ka uza ba atividade extra sira, maibé atu uza duni ba Covid-19.
Tan ne'e, nia afirma, iha duni limitasaun no sei transparante ba povu hotu-hotu atu bele tau-matan no kontinua kritika.
Nia dehan, osan refere sei uza ba atividade ne'ebé iha relasaun ho Covid-19 no bele utuliza mós ba sosa material ne'ebé nesesita ba Covid-19.
"Se karik sosa duni ba maereial ruma entaun material ne’e tau iha ne’ebé no uza ba saida no material ne’e hira mak uza ona no hira mak sidauk uza," dehan nia.