Tuir informasaun husi membru governu informa, PM Taur husu ona ba membru governu husi partidu CNRT atu deside ida-idak nia dalan.
“Primeirui Ministru husu ba membru governu sira husi CNRT deside, mas PM informa ona ba ami katak sei hatama FRETILIN nia membru sira ba kaer pasta Ministru sira ne'ebé sei mamuk,” dehan fonte ne'e ba www.tempotimor.com, Kuarta (29/04).
Iha parte seluk membru governu ida ne’ebe hola parte mos iha Reuniaun Konsellu Ministru iha Ministeiru Finansas Aitarak Laran konfirma deklarasaun husi Ministru Negosiu Estranjeiru no Kooperasaun, Dionisio Babo.
“Ohio Primeiru Ministru dehan, ha’u (PM) louva imi (membru governu husi CNRT) nia servisu ne’ebe durante ne’e ha’u iha keixa ruma kontra imi, durante ne’e kolabora. Imi servisu ho vontade di’ak ne’ebe ha’u la iha intensaun atu hasai imi maibe ita ema husi partidu ne’ebe desizaun partidu mak fo hanoin ba imi atu sai ou desizaun pesoal imi ida-idak nian, ne’e ha’u respeita,” esplika Ministru Transporte Komunikasaun, Jose agustino ba Tempo Timor hanesan deklarasaun ne'ebe fo sai husi MNEK Dionisio Babo ba midia antes ne'e.
VIDEO PUBLISIDADE APELU HUSI PM TAUR APLAUS BA FRONT LINE
Entretantu, iha tuku 15.30 loraik, CNRT realiza enkontru estra-ordináriu iha sede partidu CNRT, Bairru Dosgrilhos no remata iha 20:15.
Tuir observasaun jornalista www.tempotimor.com, iha terenu nota katak, membru governu daualu ne'ebé partisipa iha reuniaun estra-ordináriu ne'e mak Ministru Prezidensia Konsellu Ministru Agio Pereira, Ministra Edukasaun Juventude Desportu (MEJD) Dulce de Jesus, Ministru Administrasaun Estatál (MAE) Abilio José Caetano, Ministra Finansas (MF) Sara Lobo Brites, Sekretáriu Estadu Juventude Desportu (SEJD) Nélio Isaac Sarmento, no Sekretáriu Estadu Kooperativa (SEKoop) Arsenio Pereira, eis Vise Ministra saude Elia de Araujo, membru governu seluk inklui deputadu balun.
Iha reuniaun estra-ordináriu ne'e mós partisipa husi Prezidente Parlamentu Nasionál (PPN) Arão Noé de Jesus da Costa Amaral, Xefe Bankada CNRT Duarte Nunes, Sekretariu Jerál interinu CNRT Jacinto Rigoberto, Asesór prinsipál PPN Julio Tomas Pinto.
Enkontru ne'e hola parte mós husi jurista Manuel Tilman.
Hafoin partidu CNRT hala'o reuniaun estra-ordináriu, xefe bankada PD deputadu António da Conceição mós update nia status facebook katak naok-ten asaltu uma, naok ema ida de'it.
"Ami-nia uma Kolmera ema asalta. Sasan la foti mais lori sai de'it ema ida," dehan nia iha ninia pajina facebook Kalohanmas.