Naimori: Deskulpa, Ha'u La Ba Hamutuk Ho FRETILIN

Konselleiru Maximu partidu KHUNTO, jose dos Santos Naimori ko'alia ba midia haleu husi estrutura prinsipal Partidu iha sede Manleu Ana (30/4) Konselleiru Maximu partidu KHUNTO, jose dos Santos Naimori ko'alia ba midia haleu husi estrutura prinsipal Partidu iha sede Manleu Ana (30/4) Foto Tempo Timor

Tempotimor (Dili) - Hafoin deside retira husi koligasaun Aliansa Mudansa ba Progresu (AMP) foun, Partidu Kmanek Haburas Unidade Nasionál Timor Oan (KHUNTO) ho diplomatikamente deklara laiha intensaun atu hamutuk ho Partidu FRETILIN.

"La signifika ha'u sai husi CNRT atu ba fali FRETILIN, ne'e deskulpa. Sira ha'u-nia maun, sira ha'u-nia aman no lider nasaun ida ne'e nian, entaun hotu-hotu promove no kuidadu sira hanesan ita-nia lider," dehan Konselleiru Másimu Partidu KHUNTO, José dos Santos 'Naimori, Bucar, iha nia rezidénsia Maneluana, Kinta (30/4).

Nune'e, Konselleru Másimu Partidu KHUNTO fó parabens ba Partidu FRETILIN tanba apoiu VIII Governu Konstitusional ne'ebé lidera husi Taur Matan Ruak.

"Bainhira FRETILIN mak apoiu governu daualu ne'ebé lidera husi Primeiru Ministru, Taur Matan Ruak, ha'u fó parabens ba FRETILIN, tanba FRETILIN bele asegura VIII Governu Konstituisionál hodi to'o tiha 2023," tenik Naimori.

VIDEO PUBLISIDADE APELU HUSI PM TAUR APLAUS BA FRONT LINE

 

Konselleiru Másimu Partidu KHUNTO mós lori partidu nia-naran hato'o agradese ba FRETILIN, tanba apoiu PM Taur Matan Ruak nia governasaun.

"Lori ha'u-nia partidu tomak, agradese ba FRETILIN señor Sekretáriu Jerál Marí Alkatiri, hamutuk ho nia deputadu 23 iha Parlamentu Nasionál atu fó apoiu ba VIII Governu," dehan nia.

Antes ne'e, Partidu KHUNTO hakerek ona karta ofisiál ba koligasaun AMP hodi deside husik AMP no fó konfiansa ba VIII Governu Konstitusionalidade lideradu husi Primeiru Ministru, Taur Matan Ruak.

Tuir karta Partidu KHUNTO nian, haree ba situasaun polítika rai-laran laiha serteza ba solusiona impase polítika ne'ebé akontese durante tinan tolu nia-laran. Hanesan partidu polítiku tenke iha pozisaun polítika hodi fó solusaun.

Situasaun koligasaun AMP seidauk hetan konfirmasaun no aseitasaun husi Prezidente Repúblika husi koligasaun AMP foun hodi fó alternativu ba formasaun IX Governu.

Partidu KHUNTO konsidera ba deklarasaun konfiansa no apoiu tomak husi Prezidente Repúblika, Francisco Guterres Lú Olo ba Primeiru Ministru, Taur Matan Ruak, atu lidera nafatin VIII Governu Konstitusionál.

Partidu KHUNTO hola parte mós iha estrutura VIII Governu Konstitusionál, nune’e deside sei fó apoiu tomak ba Governu atuál to’o iha Tinan 2023.

Partidu KHUNTO atu foti desizaun tanba haree ba interese povu no Estadu maka deside sai husi Koligasaun AMP foun. (*)

 

Rate this item
(0 votes)
Last modified on Saturday, 09 May 2020 14:33
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.