Kalohan ne’ebé sai mós nu’udar Sekretariu Jeral Aliansa Maioria Parlamentar (AMP) foun ne’ebé forma husi CNRT, PD, PUDD, UDT no FM ne’e informa, enkontru ho Prezidente PN atu fó hanoin molok Prezidente PN foti desizaun ba rekerimentu destituisaun ne’ebé bankada tolu aprezenta.
"Ha'u mai enkontru ho Prezidente PN na kualidade hanesan Sekjer AMP foun ne'ebé lidera husi partidu CNRT, ne'e eziste ka la eziste ne'e buat seluk ida, maibé ha'u mai enkontru ho Prezidente PN ligadu ho detituisaun ba meza Parlamentu Nasionál nian," dehan Sekjer AMP foun ne’e iha PN, Sesta (08/05).
VIDEO PUBLISIDADE APELU HUSI PM TAUR APLAUS BA FRONT LINE
Tuir Kalohan, nia fó konsellu ba Prezidente PN katak meza PN ne’ebé nia lidera daudauk ne’e mak hahoris governu konstitusional daualu, signifika legalidade meza PN tenke iha.
"Ha'u mai hanesan mós deputadu ida husi bankada ne'ebé durante ne'e vota hela ba VIII governu ho a favór, entaun mai fó hela hanoin ida ne'e ba par señor prezidente (PN) bele mós konsidera, se la konsidera mós ne'e Prezidente PN mak sei bele deside," dehan Kalohan.
Deputadu ne'e dehan, bainhira iha ona hanoin atu sobu meza PN, tenke mós iha ona orientasaun ba formasaun governu dasia.
PUBLISIDADE
"Agora hanoin atu sobu meza PN ne'e, tenke ser dehan iha ona orientasaun atu governu foun karik, mais tenke ser iha pronunsia ida mai husi Prezidente Repúblika (PR) par ami mós hatene katak iha ona planu ba governu dasia," dehan nia.
Nia hatutan, bainhira pronunsia ona governu foun, fasil ona atu halo mudansa ba meza PN.
"Bainhira PR pronunsia ona ba governu dasia, entaun ne'e fasíl liu ita atu ko'alia, la'ós destituisaun ona, mais pasajen husi governu daualu ba governu dasia.”
Entretantu, kompozisaun meza PN ne’ebé dadauk ne’e eziste mak Prezidente PN Arão Noé de Jesus da Costa Amaral (CNRT), Vise Prezidente PN Maria Angelina Sarmento (PLP), Vise Prezidente Luis Roberto (KHUNTO), Sekretária Meza PN Maria Terezinha Viegas (CNRT), Vise I Sekretária Meza PN Isabel Maria Barreto Freitas Ximenes (UDT/FM), no Vise II Sekretária meza PN Regina Freitas (PLP).
PUBLISIDADE