Prezidente Partidu CNRT, Kay Rala Xanana Gusmão, haruka ona karta retira ofisiál ba Primeiru Ministru, Taur Matan Ruak, maibé membru Governu husi Partidu CNRT balun sei hein fali karta ofisiál husi Komisaun Polítika Nasionál (CPN) Partidu CNRT molok deside hodi rejigna-aan husi governu.
Desizaun Partidu CNRT sai retira husi Governu deside unanimidade husi CPN-CNRT iha loron 30 Abríl 2020, maibé karta ofisiál foin aprezenta ba Primeiru Ministru, iha loron 11 Maiu 2020.
VIDEO PUBLISIDADE APELU HUSI PM TAUR APLAUS BA FRONT LINE
Nune'e, desizaun ne'e to'o iha meza Primeiru Ministru no deklara ofisialmente husi Partidu CNRT rasik, maibé liu ona oras 24 seidauk iha membru governu ida maka aprezenta karta rejignasaun.
Partidu CNRT 'kaan' hela podér ne'ebé hatudu momoos husi sira-ninia karta ofisiál ne'ebé fó flesibilidade ba membru Partidu CNRT ne'ebé envolve-aan iha VIII Governu.
Ne'e duni, Partidu CNRT hatudu katak, sira retira ona apoia ba Governu mas 'izmola' hela atu hetan poder iha Governu ne'ebé lidera husi Taur Matan Ruak.
"Ida ne'e desizaun husi partidu nian, maibé to'o agora ami seidauk simu informasaun ruma husi partidu, tanba ne'e mak ha'u seidauk hola pozisaun," dehan Sekretáriu Estadu Kooperativa (SEKoop), Arsénio Pereira, ba www.tempotimor.com via telefone, Tersa (12/5).
Bainhira iha ona karta maka Arsenio prontu ezekuta hodi aprezenta karta rejignasaun tanba sira indijita husi Partidu CNRT.
PUBLISIDADE
"Husi horisehik to'o ohin loron seidauk simu karta", tenik nia.
Relasiona ho pontu tolu ne'ebé CPN-CNRT fó sai ne'e klaru, maibé nu'udar membru governu sei hein karta.
"Iha pontu tolu ne'ebé horisehik ha'u akompaña iha média ne'e hanesan ne'e duni, maibé ohin loron ha'u seidauk hola desizaun ruma, ne'ebé atu kontinua ka rejignasaun ne'e ha'u seidauk hola pozisaun ruma. Mais ha'u hanoin horsida lokraik ka aban mak iha ona buat ruma ha'u sei fó hatene," nia dehan.
Governante ne'e dehan, hanesan membru governu ativu sei submete de'it ba Primeiru Ministru (PM), Taur Matan Ruak.
"Ami nu'udar membru governu tenke submete ba Primeiru Ministru. Entaun depois fó informasaun ba públiku ba ema hotu hatene. Agora atu fó hatene tiha mak ema hatene hotu, atu sai ka kontinua ne'e," dehan Arsénio. (*)
PUBLISIDADE
