TT (Dili)-Bankada Parlamentár Fretilin, PLP no Khunto ohin hato'o ona keixa ba Ministériu Públiku (MP) relasiona ho ho ameasa ne'ebé Organizasaun Brigada Negra hasoru Órgaun Soberanu Parlamentu Nasionál (PN) iha loron 15/05 horseik.

"Ohin, loron 16 maiu 2020, reprezentante husi bankada parlamentar FRETILIN, PLP no KHUNTO hatama ona keixa ida ba Ministeriu públiku (MP) hasoru organizasaun Brigada Negra ba sira nia áktu deklarasaun ne’ebé ameasa Órgaun Soberania Parlamentu Nasionál iha loron 15 maiu 2020 horseik," dehan iha komunikadu imprensa ne'ebé TT.com asesu, Sábadu (16/05)

Iha komunikadu imprensa ne'e mós sita katak, bainhira Vise-Prezidente Parlamentu Nasionál (PN) brani lidera meza PN mak Organizasaun ne'e sei halo asaun hodi tama PN.

"Iha sira nia deklarasaun, Brigada Negra deklara “karik vise PPN sira brani halo duni iha segunda (18/05) mai ne’e, mak ami aviza, ita boot sira loke dalan ona ba ami tomak atu la respeita tan leis no órgauns de soberania. Ami sei mobiliza povo atu okupa kadeira sita iha Parlamentu Nasionál to’o Presidente Repúblika (PR) dekreta disolusaun PN no konvoka Eleisaun Antesipada," sira iha komunikadu imprensa

Bankada Parlamentár tolu ne'e aprezenta keixa ba MP, tanba konsidera aktu Organizasaun Brigada Negra halo krime públiku.

"Deklarasaun ida ne’e bankada parlamentar FRETILIN, PLP no KHUNTO konsidera nu’udar krime públiku no krime hasoru Estadu tamba halo koasaun hasoru Órgaun Soberania Estadu nian PN no tenta perturba ninia funsionamentu normál," afirma iha komunikadu.

Remata komunikadu ne’e, deputadu sira husi bankada parlamentar tolu hato’o keixa ba Prokuradór Jerál Repúblika (PJR) atu hahú prosedimentu kriminál no loke investigasaun ba krime hasoru Órgaun Soberania Estadu ida ne’e.