Reuniaun iha Grilos, Xanana Tuur Rona De’it

Vise Xefe Bankada, Patrocino dos Reis ko'alia ba jornalista sira iha parlamentu Vise Xefe Bankada, Patrocino dos Reis ko'alia ba jornalista sira iha parlamentu foto arkivu

Tempotimor (Dili)- Hafoin bankada CNRT baku rahun meza PPN no tuda kadeira no bankada tolu iha Parlamentu Nasionál halo votasaun ba destituisaun no substituisaun Prezidente Parlamentu Nasionál Arão Noé de Jesus Amaral, ohin loraik, deputadu sira husi bankada CNRT, konvoka kedas reuniaun urjente iha sede nasionál Bairru dos Grilhos, ne’ebé marka prezensa mós husi prezidente Partidu Kay Rala Xanana Gusmão.

Vise Xefe bankada CNRT deputadu Patrocínio dos Reis Fernandes hateten, reuniaun ne’e, atu lori prosesu ne’e ba tribunál,  ne’ebé marka prezensa mós husi Prezidente partidu CNRT Kay Rala Xanana Gusmão. 

“Marka prezensa mós husi Prezidente partidu CNRT Kay Rala Xanana Gusmão, mai tuur rona de'it atu lori prosesu ne'e ba tribunal”, dehan Patrocínio.

 

VIDEO DEPUTADU SOBU MEZA PREZIDENTE PARLAMENTU NASIONAL

 

 

Nia hatene, hafoin reuniaun Partidu lokraik ne’e kedan, enkamina kedan keixa ba Tribunál Rekursu (TR) no Ministériu Públiku (MP) Kontra asaun ne'ebé bankada Fretilin-PLP no KHUNTO halo iha plenária Parlamentu Nasionál (PN) tanba kontra konstituisaun RDTL no rejimentu Parlamentu Nasionál.

"Ami ohin enkontru urjente hodi afirma ami nia pozisaun, tanba prosesu sira ne'ebé la'o iha PN, ne'e prosesu ilegál, prosesu ne'ebé asaltu poder nian, kontra konstituisaun, kontra rejimentu, kontra lei LOFAP ninian, ne'ebé ami hatama ona keixa ba iha Tribunal Rekursu (TR) no Ministériu Públiku (MP) depois hein desizaun husi sira ne'e," nia informa.

Lia fuan sira ne'ebe deputadu CNRT ko'alia ne'e hanesan lolo'os lia fuan sira ne'ebe hasai husi bankada FRETILIN iha segunda lejislatura wainhira plenaria ho lia fuan asaltu poder, inkonstitusional, de facto no seluk tan.

Keixa ne’e rasik entrega dirata ba instituisaun relevante husi advogadu ida ne’ebé la temi naran, no hein desizaun tribunal. 

Deputadu CNRT ne’e, husu ba militante no simpatizante sira atu kontinua hakmatek hodi akompaña prosesu sira ne'ebé lori ona ba iha tribunál.

 

VIDEO PUBLISIDADE APELU HUSI PM TAUR APLAUS BA FRONT LINE

  

 

Rate this item
(2 votes)
Last modified on Wednesday, 20 May 2020 13:51
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.