Hatán ba pozisaun bankada CNRT ne'ebé la partisipa iha reuniaun lider bankada ne'e, Xefe Bankada CNRT dehan hala'o tuir prinsipiu no hein desizaun tribunal.
"Ami so depois de tribunal nian desizaun katak legál ka la legál mak ami foin deside atu partisipa iha reuniaun lider bankada la lae, mais enkuantu seidauk sai, ami seidauk partisipa," dehan xefe bankada CNRT deputadu Duarte Nunes iha salaun bankada CNRT, Kinta (21/05).
VIDEO PUBLISIDADE APELU HUSI PM TAUR APLAUS BA FRONT LINE
Nia mós dehan, bankada CNRT la partisipa iha reuniaun lider bankada la'ós boikota maibé iha prinsipiu.
"Ami la'ós bokoita, maibé ami nia direitu tanba ami halo ona rekursu ba tribunal depois ami partisipa fali ne'e, entaun ami nia pozisaun ne'e oinsa, ami iha prinsipiu," dehan Duarte
Duarte mós akresenta katak, bainhira desizaun husi tribunal sai mak la'ós CNRT hakarak, CNRT sei la retira husi Parlamentu Nasionál.
Entretantu observasaun tempotimor.com nian iha terenu katak, bankada sira ne'ebé partisipa iha reuniaun lider bankada ne'e mak bankada Fretilin PLP, Khunto no PD ne'ebé partisipa mós husi reprezentante governu hanesan Sekretáriu Estadu Komunikasaun Sosiál (SEKomS) Merício Juvenal dos Reis "Akara"