Print this page

Maturidade Politika Arão ne’ebé Tarde

Lider husi Bankada FRETILIN, PLP no KHUNTO iha konefrensia imprensa iha Parlamentu Nasional Lider husi Bankada FRETILIN, PLP no KHUNTO iha konefrensia imprensa iha Parlamentu Nasional Foto Arkivu

Tempotimor (Dili)-Bankada FRETILIN, PLP no KHUNTO, apresia ho aktu politika husi Prezidente Parlamentu Nasionál sesante Arão Noe, maske konsidera tarde ona.

Vise Prezidente Bankada FRETILIN, Francisco Miranda Branco hatete, iha 22 Maiu 2020, Prezidente Tribunal Rekursu hato’o despaisu ida mai PN hodi husu atu fornese informasaun detallus balun relasiona ho prosesu destituisaun ne’ebé deputadu sira halo hasoru Prezidente PN sesante, Arão Noe Amaral no eleisaun Prezidente PN foun, Aniceto Guterres.

Despaisu Prezidente TR ne’e, Branco dehan, relasiona ho rekerimentu ida ne’ebé deputadu Arão hatama ba TR hodi husu fiskalizaun ba konstitusionalidi ba prosesu destituisaun.

Branco hatutan, bankada FRETILIN, PLP no KHUNTO apresia aktu politika Arão Noe hodi haruka rekerimentu ba fiskalizasaun ba TR, maibé bankada tolu lamenta mós tanba aktu ne’e tarde ona.

“Bankada parlamentar PLP, FRETILIN no KHUNTO apresia áktu politiku deputadu Arão Noe Amaral lori rekerimentu ba fiskalizasaun ba Tribunal Rekursu, maske ami mós lamenta tamba áktu ida ne’e nia hala’o hafoin deputadu sira husi ninia bankada rasik komete tiha ona hahalok krime iha sala plenaria nia laran, to’o baku-fila meza prezidente parlamentu nasional nian ne’ebé hamosu preokupasaun husi públiku no entidades oioin,” dehan Branco.

Tuir Branco, atu fortifika demokrasia iha TL, politiku sira tenke hatudu maturidade politika, no politiku sira mós presiza banati tuir komportamentu povu nian ne’ebé hakmatek hala’o sira-nia moris ho normal maske sira-nia reprezentante sira iha PN hatudu hahalok ne’ebé laos sai ezemplu di’ak.

Iha fatin hanesan, Prezidente Bankada PLP, Francisco de Vasconcelhos dehan, loloos Arão Noe lori kedas keixa ba pedidu destituisaun hasoru nia ba TR molok deputadu CNRT sira halo asaun iha 18 no 19 Maiu 2020.

Maske nune’e, Vise Prezidente Bankada KHUNTO, Olinda Guterres apresia ho komportamentu politika husi Arão Noe ne’ebé ho fuan boot entrega gabinete, rezidensia ofisial no sasan Prezidente PN nian ba Prezidente PN eleitu, maske Arão rasik deklara sei hein desizaun final husi TR.

“Tuir ami-nia hanoin, tuir loloos hahú kedas iha rekerimentu destituisaun hasoru nia ne'e nia kopera antes karik laiha disturbius no estraga sasan sira,” hatete Olinda.

Maske apresia ho hahalok polítiku deputadu Arão, maibé bankada tolu ne’e sei nafatin buka dalan hodi keixa hahalok abuzu poder ne’ebé komete husi Prezidente PN sesante.

“Ida ne’e la taka dalan ba keixa kona-ba abuzu poder ne’ebé deputadu Arão Noe komete hodi viola rejimentu parlamentu nasional nian liu husi rejeita atu ajenda votasaun ba pedidu destituisaun ne’ebé tuir loloos nia tenke ajenda obrigatoriamente iha loron 5 nia laran tuir Art. 16-B rejimentu parlamentu nasional, hodi atu koko blokeia funsionamentu normal Parlamentu Nasional nian,” deklara bankada tolu ne’e.

 

VIDEO PUBLISIDADE APELU HUSI PM TAUR APLAUS BA FRONT LINE

Rate this item
(0 votes)
Last modified on Monday, 25 May 2020 11:30
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com