Login to your account

Username *
Password *
Remember Me

Dilema Membru CNRT iha Governu: Entre Hela ho VIII Governu no Fila ba Partidu

Tempitimor (Dili)-Maske CNRT deklara retira ona husi governu konstitusional daualu no ne’ebé lidera husi Primeiru Ministru Taur Matan Ruak, maibé membru governu husi partidu CNRT seidauk foti desizaun atu rezigna an ka mantein iha governasaun.

Sekretariu Estadu ba Asuntu Kombatentes Libertasaun Nasionál Gil da Costa "Oan Soru" ne’ebé reprezenta partidu CNRT iha governu daualu, deklara nia parte seidauk foti desizaun.

"Purencuanto karta (rezignasaun) deit to'o agora ha’u seidauk halo, tanba ha’u kuandu halo karta automatika ha’u-nia veteranu sira ne'e hanesan ha’u hatete, 95 pursentu karik hirus ha’u, mais 5 pursentu karik sira arepende,” dehan Oan Soru ba www.tempotimor.com via telemovel, Tersa (12/05).

Tan ne’e, Oan Soru dehan, to’o ohin nia sei nonook no sei tetu desizaun di’ak liu ne’ebé nia sei foti iha tempu oin mai.

“Tanba ne'e ha’u agora sei nonok hela, dala-ruma kalan i loron mós ha’u tuur hanoin, par hamutuk sa resposta mak ha’u bele fó para sira labele hela ho arependementu."

Kona-ba ezijensia husi partidu CNRT ne’ebé ezije ba ninia membru iha governu atu rejigna an, Oan Soru dehan, nia seidauk foti desizaun ba asuntu ne’e.

"To'o agora seidauk fó ha’u-nia estementu ida publikumente ba prekupasaun husi partidu. Sim, ha’u uluk hamrik iha palku hodi koalia kona-ba politika AMP nian ne'e tanba Maun Xanana ho Maun Taur, sira na’in rua mak konvida, ne'ebé agora ha’u-nia pozisaun ne'e ha’u seidauk hatete A, B ka C.”

“Mezmu nune'e, ha’u nunka dehan Matan Ruak mak di’ak ou Xanana mak at, ha’u la koalia, agora dala-ruma publiku koalia, ema husu ba ha’u dehan tuir ita-boot ne'e, halo tuir lei mak di’ak ka kontra lei mak di’ak, ha’u dehan nunka estuda lei ida, mais na’in rua (Xanana-Taur) konvida, ha’u hatene, mais lei legal ka la legal ne'e mak ha’u la hatene tanba ha’u la estuda," dehan nia.

Maske rekoñese katak nia sai membru governu tanba partidu CNRT mak eskolla nia, maibé Oan Soru seidauk bele deside ninia pozisaun.

"Kuandu hahan ne'e ha’u koko, tanba ida midar i ida moruk, ne'e de’it, mais se moruk mós bele han i midar mós bele han, entaun han de’it," dehan nia.

Maske seidauk foti desizaun ruma, maibé Oan Soru agradese ba partidu ne’ebé lidera husi Xanana no ba mós PM Taur Matan Ruak, tanba fó fiar ona ba nia hodi assume kargu iha governu daualu.

“Ha’u nafatin agradese tanba maun sira hakarak buka hatene i hakarak hatene didi’ak katak iha ema ida hanesan ne'e ita buka koko tauk took ba membru governu, nia bele halo buat ruma iha area veteranus nian ne'e ka lae."

Oan Soru lembra mós nia promesa ne’ebé nia hato’o durante tempu kampaña ba veteran sira ne’ebé to’o ohin loron nia sei esforsu atu bele realiza.

"Ha’u halo komprimisiu ba veteranu sira katak ida ne'e mak ba mate sira ita tenke halo ou ida ne'e mak ba moris sira ita tenke halo, ita tenke agradese ba ita-nia pasadu no ita tenke reafirma ita-nia prezente no projeta ita-nia futuru. Agora, lia-fuan ida ne'e mak segunda ves kampaña ha’u promete ba veteranu sira iha teritóriu tomak. Kiak sira rona, faluk sira rona i veteranu sira be moris uitoan de’it ona ne'e rona, hotu-hotu rona."

Tan ne’e, nia hatutan, to’o ohin nia seidauk foti desizaun atu mantein ka rezigna an husi governu daualu maske partidu CNRT mak indizita nia sai membru governu

Durante ne’e bainhira halo sosializasaun iha munisipiu sira, Oan Soru lembra, maioria veteranus husu karik iha remodelasaun no PM Taur troka nia, oinsa ho politika ba veteranus ne’ebé Oan Soru hala’o daudauk.

 

VIDEO PUBLISIDADE APELU HUSI PM TAUR APLAUS BA FRONT LINE

 

Hatan ba ida ne’e, Sekretariu Estadu ne’e dehan, atu troka membru governu ne’e kompetensia PM Taur, importante mak bainhira nia sei sai Sekretariu Estadu, nia sei esforu atu implementa programa no politika ne’ebé nia halo ona.

Tetu buat hirak ne’e hotu, Oan Soru dehan, nia seidauk bele fó sai estetmentu atu rezigna an ka mantein iha governu tanba bele hamosu arependimentu husi veteranu sira.

"Ha’u labele hasai estementu derepente par hodi halo arependementu ida mosu tan ba 5 pursentu (veteranus) ne'e, labele. Perpara politika ba mate, moris sira, oinsa mak hatene mate ne'e serteza, oinsa bele hatene katak viajen moris sira ne'e atu ba ne'ebé?, Ne'e ita perpara hotu, ita kuandu ba esplika i hasai estementu ida derepente halo ema arepende. Ida ne'e ha’u seidauk hasai ha’u-nia hanoin ruma lalais, karik iha momentu ruma, situasaun ruma, katak loloos duni ha’u bele hasai ona estementu, ok, ha’u prontu hasai," Oan Soru deklara.

Rate this item
(0 votes)
Last modified on Monday, 25 May 2020 11:30
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter