Lere Xama Antensaun: “Lalika Hatama Kanuru Tohar iha Maun sira-nia Problema”

TempoTimor (Dili)-Maior Jeneral FALINTIL Forsa Defeza Timor-Leste (F-FDTL) Maijor Jeneral Lere Anan Timur husu ba grupu veteranu sira ne’ebé mosu hodi defende lider balun atu lalika hamata sira-nia kanuru tohar ba problema entre lider sira.

Maijor Jeneral Lere hato’o kestaun ne’e relasiona ho deklarasaun husi grupu veteranus Brigada Negra no Reis Kadalak ne’ebé deklara prontu atu fakar ran.

“Ha’u husu liu-liu ba ema veteranu sira, rezistensia nia ema, lalika kaer politika fahe ema, ne’e ha’u koalia kona-ba Brigada Negra, Reis Kadalak sira. Primeiru deklarasaun krime nian tanba sira deklara, prontu par ran fakar, ran fakar ba saida? Ida ne’e deklarasaun krime, mais tanba de’it katuas Xanana, Katuas Taur no katuas Lú Olo iha deverjensia uitoan mak imi prontu fakar ran”. Ne’e mak ha’u hatete bebeik, kuandu ita-nia maun sira-nia problema, di’ak liu ita lalika hatama ita-nia kanuru tohar. Hanesan uluk ha’u hatete, sira hatene halo problema, sira mak tenke sai solusaun ba sira-nia problema,” dehan Lere hafoin hasoru-malu ho Prezidente Repúblika Francisco Guterres Lu Olo iha palasiu prezidensial, Kuarta (27/05).

Lere kestiona mós deklarasaun grupu veteranus ne’ebé hatete sira sei hamutuk ho Xanana to’o ne’ebé de’it.

“Impase politika ne’ebé agora ita haree ninia huun ne’e mai husi ne’ebé?, ema tenke buka hatene nia huun, mais atravez media fó sai sempre fó sai maun Xanana nia naran, maun Taur no maun Lú Olo nia naran. Sira na’in tolu ne’e se? par Reis Kadalak, Nuno Brigada Negra dehan katak ‘ami hamutuk ho Xanana to’o iha ne’ebé de’it’,mais nusa mak o la hamutuk Taur no labele hamutuk ho Lú Olo?.”

“Ne’e imi komesa fahe, Xanana see? Taur see? Lú Olo see? no labele halo deklarasaun ida dehan ‘ami pronto fakar ran’. Bosok-teen. Ami ne’e mak uluk hakarak mate iha kombate, mate ne’e mate ona, mais agora labele halo deklarasaun tun-sa’e hodi fahe fali ita-nia lider sira ne’e, ne’e deklarasaun ida KRIMI nian,” dehan Lere.

Tanba ne’e, Komandante F-FDTL ne’e apela ba veteranus no ema rejistensia tomak atu tenke hamutuk no lori lider sira hanesan Alkatiri, Horta, Xanana, Taur no Lu Olo hodi tuur hamutuk ba dialogu.

“O labele ba liu husi ida ne’eba depois hasees fali ida seluk. Ne’e ha’u hanoin katak labele halis ida, nune’e ema seluk aproveita fali ita, organijasaun sira ne’e mesak rejistensia nia ema de’it. Tanba ne’e apela nafatin ba maluk rezistensia atu kuidadu halo deklarasaun nune’e halo todan tan problema,” nia husu.

 

VIDEO PUBLISIDADE APELU HUSI PM TAUR APLAUS BA FRONT LINE

 

Rate this item
(1 Vote)
Last modified on Wednesday, 27 May 2020 14:16
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.