Tuir komunikadu ne’ebé fó sai husi palasiu prezidensial, entre prizioneiru na’in 18 ne’e, prizioneiru na’in 17 sei hetan indultu total ka liberdade total no prizioneiru na’in ida hetan indultu parsial tinan ida.
Komunikadu ne’e hatete, Xefe Estadu ezerse ninian kompeténsia fó indultu no komutasaun ba pena, ne’ebé tuir loloos atribui iha loron selebrasaun restaurasaun independénsia Timor-Leste ba dala-18, iha 20 maiu, maibé tanba estadu emerjénsia parte relevante sira la konsege kompleta informasaun hodi tuir prosedimentu ne’ebé lei haktuir hodi komprova situasaun ba Prezidente Repúblika molok foti desizaun. Tanba ne’e, Prezidente Repúblika foin bele fó indultu no komutasaun ba prizoneiru na’in-18, iha 28 maiu 2020.
Prizioneiru hirak ne’ebé hetan indultu total mak Calistro Madeira dos Santos, João de Fátima de Deus, Eduardo de Deus, Marito de Jesus, João Barreto, Francisco Ferreira, Odete Martins, Basílio Domingos Hendrique Lemos, Zeca dos Santos Leco, Custódio Manuel da Silva Mau-Meta, Francisco Martins, Jacob Maia de Deus, Pedro Massa, Marcelino Doutel Sarmento, Carlito Doutel Sarmento, Fernando Francisco, no Tomás Francisco. Enkuantu prizioneiru ne’ebé hetan indultu parsial ba tinan ida mak Miguel Barreto.
Entretantu, komunikadu ne’e informa, iha tinan ida ne’e PR simu pedidu indultu no komutasaun husi Ministériu Justisa hamutuk 184.
Molok Prezidente Repúblika foti desizaun, komunikadu ne’e esplika, prosesu ba pedidu idaidak tenke akompaña ho dokumentus sira husi servisu reinsersaun sosial no informasaun seluk, inklui kondisaun saúde prizoneiru husi junta médika.
“Pedidu indultu no komutasaun ba pena ba prizoneiru sira seluk nian husi Ministériu Justisa iha prosesu nia laran no Prezidente Repúblika sei foti desizaun iha loron istóriku rua seluk iha 30 agostu no 28 novembru tinan ne’e.”
VIDEO PUBLISIDADE APELU HUSI PM TAUR APLAUS BA FRONT LINE