Print this page

Meta Malik: “Ha’u mai atu Kontinua, La’os Destroi”

Ministru Asuntu Veteranu, Julio Sarmento Meta Mali, Ko'alia ba Jornalista sira, hafoin simu pose husi Prezidente da Republika, Dr. Francisco Guterres Lu Olo iha Palasiu Prezidensial Dili (29/5) Ministru Asuntu Veteranu, Julio Sarmento Meta Mali, Ko'alia ba Jornalista sira, hafoin simu pose husi Prezidente da Republika, Dr. Francisco Guterres Lu Olo iha Palasiu Prezidensial Dili (29/5) Foto Tempo Timor

Tempotimor (Dili)-Ministru ba Asuntu Kombatentes no Libertasaun Nasionál (MAKLN) Julio Sarmento da Costa “Meta Mali” ne’ebé foin simu pose hodi sai membru governu konstitusional daualu hatete, nia tama iha governu hodi kontinua de’it serbisu ne’ebé hala’o ona durante ne’e.

Maske kandidatura Meta Mali iha governu ne’e konsege hamosu polemika tanba molok ne’e Partidu Demokratiku nia pozisaun ne’ebé sei “namlele” hela, maibé ikus mai, Meta Mali la hetan impedimentu signifikante hodi asume kargu ne’ebé fó ba nia.

Hafoin simu pose, Meta Mali hatete, nia sei serbisu hamutuk ho Sekretariu Estadu ba Asuntu Kombatentes Libertasaun Nasionál (SEAKLN) Gil da Costa "Oan Soru" hodi kontinua politika no programa ne’ebé hala’o ona.

"Planu, polítika, sasan iha nanis kedas, ne’ebé sekretariu estadu hala'o ona, nune’e hanesan ministru, ba la halo buat seluk ona, nafatin serbisu hamutuk ekipa atu bele hala'o kna’ar ne’e di'ak ba povu,” dehan Meta Mali iha palasiu prezidensial Nicolau Lobato, Sesta (29/05).

Nia afirma, ninia prezensa iha governu daualu ne’e atu kontinua de’it mandatu restu ne’ebé iha, tan ne’e nia labele halo fali programa foun hodi destroy programa ne’ebé hala’o ona.

“Kontinua de'it mandatu restu ne'ebé iha, nune’e ha’u labele halo fali progama foun atu destroi fali programa ne’ebe hala'o ona,” nia hatete.

Iha oportunidade ne’e, Meta Mali mós agradese ba konfiansa husi Primeiru Ministru Taur Matan Ruak no Prezidente Repúblika ba nia hodi asume kargu ministru.

“Sentimentu hanesan bai-bain tanba konfiansa ne’ebé depozita husi Primeiru Ministru (PM) no autoridade ne’ebé fó fiar mai ha’u, nu'udar ema ba rai no povu ida ne’e, prontu atu servi, tanba ne’e la sente todan hamutuk ho povu atu fó resposta ba povu," dehan nia.

 

VIDEO PUBLISIDADE APELU HUSI PM TAUR APLAUS BA FRONT LINE

Rate this item
(2 votes)
Last modified on Friday, 29 May 2020 19:53
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items