Iha governu Aliansa Maioria Parlamentar (AMP) ne’ebé forma husi CNRT, PLP no KHUNTO, Armanda Berta hetan fiar hodi asume kargu nu’udar Ministra Solidariedade Sosial no Inkluzaun (MSSI).

Fofoun bainhira hala’o nia knar ida ne’e, Armanda hetan kritika maka’as. Kritika ne’e mosu hafoin mosu video ida ne’ebé hatudu Armanda halo hela aprezentasaun ida ho lian ingles iha sorumutu nivel internasional.

Mosu kritika lubuk no balun hatete katak Armanda nia asaun ne’e hamoe Timor-Leste.

La to’o ne’e de’it, mosu mós gravasaun lian balun husi ministra Armanda bainhira hatan lia husu husi jornalista sira kona-ba seguransa alimentar.

Ministra Armanda iha altura ne’ebá “konfunde” lia-fuan seguransa sosial ho seguransa ba estabilidade nasaun nian.

Iha mós intervista ba programa Governu Koalia hodi koalia kona-ba kiak iha Timor-Leste, ministra Armanda la konsege fó resposta sertu ba pergunta kona-ba klasifikasaun kiak iha Timor-Leste.

Mosu kritika lubuk ba resposta ministra tanba balun konsidera ministra Armanda la kompriende pergunta ne’ebé aprezentadora husu no balun hatete ministra lee tuir de’it saida mak hakerek ona no la halo analiza ba pergunta ne’ebé iha.

Bainhira aprezenta programa MSSI iha Parlamentu Nasionál, kritika lubuk ida mós mosu, la’os de’it husi deputadu sira maibé husi públiku ne’ebé akompaña transmisaun direta husi TVTL.

Maske mosu kritika oioin, maibé ministra Armanda mantein ho ninia pozisaun. KHUNTO ne’ebé sai nu’udar partidu ne’ebé apoiu governu fó garantia porsentu 100 katak kadeira ne’ebé sira-nia prezidente okupa iha governu daualu sei la nakdoko nein uitoan.

Ho situasaun politika ne’ebé mosu, liu-liu bainhira Prezidente Repúblika deside la fó pose ba membru governu na’in sia (9), na’in 7 husi CNRT no na’in rua (2) husi KHUNTO, ne’ebé halo CNRT deside xumba OJE 2020, KHUNTO mós hahú “nakdoko”.

CNRT haree oportunidade di’ak atu hakuak partidu politiku kiik sira hodi bele hetan maioria nune’e bele iha posibilidade atu forma governu foun.

Ikus mai, iha 20 Fevereiru 2020, CNRT hamutuk ho KHUNTO, PD, PUDD, UDT, no Frente-Mudansa, konsege forma duni koligasaun Aliansa Maioria Parlamentar foun.

Aliansa ne’e aprezenta aan ba Prezidente Repúblika Francisco Guterres Lu Olo, ne’ebé molok ne’e realiza enkontru ho lider partidu politiku sira hodi husu atu sira bele buka malu hodi hakotu impase politika ne’ebé TL hasoru durante tinan tolu ona.

PM Taur ne’ebé konsiente “lakon ona” deside hatama karta rejignasaun ba PR Lu Olo. Maibé ikus mai, PM retira fila fali ninia karta refere.

Esperansa koligasaun foun atu harii governu dasia mós hahú lakon bainhira iha 29 Abril 2020, KHUNTO deside hodi sees an husi koligasaun foun ne’e.

Razaun ne’ebé KHUNTO fó iha altura ne’ebá mak sira hakarak mantein fó apoiu ba governu daualu tanba governu ne’e sira mak forma no sira lakohi atu husik nia ema sira iha governu.

Razaun politika saida de’it mak molok ne’e KHUNTO fó ona karik nu’udar razaun kiik-oan de’it. Karik razaun boot ne’ebé iha mak KHUNTO hakarak “hasemo” nia prezidente partidu husi kadeira Ministra ba kadeira ne’ebé aas liu.

Realidade bele prova. Iha Sesta (29/05) tuku 10:00 dader iha palasiu Prezidensial Nicolau Lobato, Dili, Armanda Berta, ofisialmente simu “kadeira foun” husi Prezidente Repúblika Francisco Guterres Lu Olo bazeia ba pedidu husi PM Taur.

Parabéns Armanda Berta ba kargu foun, Vise Primeira Ministra, iha governu konstitusional daualu ne’ebé iha fulan hirak kotuk KHUNTO hakarak “oho”.

 

VIDEO PUBLISIDADE APELU HUSI PM TAUR APLAUS BA FRONT LINE