"Desde loron ne'ebé bolu atu sai minsitra ne'e tauk ona, hanesan ema normál ita kontente teb-tebes atu sai boot, maibé, kuandu ita hare servisu ne'ebé boot, ezemplu situasaun la'ós hanesan agora, ne'e la'ós fasíl ba ita, entaun tauk, tauk to'o agora. Maibé, ha'u hein katak, buat hotu la'o ho di'ak," dehan Odete hafoin partisipa reuniaun Konsellu Ministru (KM) iha Palásiu Governu, Sesta (29/05).
Minsitra ne'e mós dehan, iha reuniaun Konsellu Ministru, Primeiru Ministru husu mós ba membru governu foun atu servisu maka'as.
"Primeiru Ministru husu ba ami sira ne'ebé mak membru governu foun, atu servisu sukat ho orsamentu ne'ebé ita iha, haree ba investimentu nasaun nian, oinsa atu rekopera ita nia nasaun, entaun ida ne'e hanesan akonsellamentu ida ba ministru no ministra foun sira," nia dehan.