Bankada FRETILIN liu husi ninia karta komunikadu deklara, kuaze fulan rua ona deputadu sira husi bankada parlamentar balun, hanesan bankada CNRT, UDT/FM no PUDD, hatudu momoos sira-nia hakarak atu halo PN sai sira-nia refén ka sandera.

Rohan husi tentativa sira ne’e akontese iha 18 no 19 Maiu liu ba. Sira tenta blokeia dalan hotu-hotu ne’ebé Rejimentu Parlamentu Nasional nian fó ba deputadu sira atu garante normal funsionamentu parlamentu ninian.

“Blokeia la’os de’it halo iha nivel polítiku sira, maibé sira ate uza sira-nia poder iha pozisaun sira iha burokrasia, mákina administrasaun públiku iha Parlamentu Nasional, ne’ebé tuir loloos estadu monta iha ne’e, no tuir rejimentu Parlamentu nian, atu fó apoiu ba deputadu sira no atu fasilita Parlamentu Nasional nia funsionamentu normal,” deklara bankada FRETILIN liu husi ninia karta ne’ebé www.tempotimor.com asesu, Segunda (01/06).

Tanba sira blokeia dalan sira ne’ebé mak Rejimentu Parlamentu nian fó no tanba sira halo blokeia iha nivel administrasaun públika nian, mak plenaria ne’ebé tuir loloos tenke la’o ho di’ak iha 18 no 19 Maiu 2020, la’o iha situasaun ne’ebé komplikadu.

“Povu tomak assiste oinsa mak maluk deputadu CNRT sira fizikamente lakohi fó fatin ba Vise Prezidente parlamentu na’in rua atu prezide plenaria, maske klaru loos katak Prezidente Parlamentu iha altura ne’ebá, deputadu Arão Noe, iha impedimentu no lakohi prezide sesaun plenaria sein esplikasaun no razaun klaru”.

“Ikus, iha plenaria loron 19, deputadu sira balun mai halo asaun krime iha sala plenaria ida ne’e liu husi baku-fila meza no kadeira Prezidente Parlamentu nian, no balun iha kraik halo tiha meza sira iha sala plenaria laran ne’e sai babadok no baku halo barullu hanesan fali sira mai tebedai iha ne’e,” dehan komunikadu ne’e.

Karta ne’e esplika, bankada FRETILIN hakarak atu fó hanoin fila fali katak PN tenke halo prosesu hasoru hahalok sira ne’e. Hahalok ne’ebé la eduka, halo moe parlamentu no hahalok ne’ebé koko atu blokeia no paraliza PN.

“Buat hotu ne’ebé akontese iha sala plenaria ida ne’e, ne’ebé komete husi polítiku no tékniku sira parlamentu nian, tenke sai nu’udar lisaun importante no boot tebtebes ida ba ita hotu”.

“Ami husu ida ne’e, la’os atu halo odio no vingansa polítika ruma iha parlamentu, maibé ami husu ida ne’e atu fó fatin ba justisa no husi ne’e ba oin, labele iha ema ida ne’ebé haknar an iha Parlamentu Nasional, husi Prezidente Parlamentu, mai deputadu sira ba to’o funsionariu sira hela ho hanoin no fiar katak sira bele blokeia no paraliza orgaun soberania ida ne’e”.

Tanba, FRETILIN dehan, fiar katak so ho nune’e de’it, Timor-oan ser de’it mak mai haknar an iha PN iha tempu tuir mai sei halo buat hotu ne’ebé sira bele atu garante funsionamentu orgaun Estadu nian no la’os tenta atu paraliza fali orgaun ida ne’e.

Liu husi buat hirak ne’e hotu, bankada FRETILIN hatete, PN hahú funsiona ho normal fila fali ona, maske sei iha impedimentu balun ne’ebé presiza rezolve atu parlamentu bele funsiona ho normal loloos.

“Sei presiza kontinua halo esforsu tomak atu normalizasaun funsionamentu bele sai di’ak no efisiente liu tan”.