Bankada FRETILIN deklara, propostas no projetu lei lubuk ida mak parlamentu ida ne’e tenke tau-matan no finaliza.

Tuir FRETILIN, proposta lei importante ida ne’ebé PN tenke prioritiza no finaliza lalais iha tempu badak nia laran mak Lei Anti Korupsaun.

Maibé, tuir bankada FRETILIN, iha fulan rua ikus ne’e, komisaun espesializada sira parlamentu nian labele funsiona ho di’ak tanba hetan blokeia husi deputadu sira bankada CNRT, UDT/FM, no PUDD.

“Atu konsege hala’o serbisu importante sira ne’e, blokeia sira hotu ne’ebé dadauk ne’e komisaun espesializada sira hasoru hela tenke loke atu garante komisaun sira fila fali ba funsionamentu normal. Ba sa, funsionamentu normal iha komisaun espesializada sira sei garante funsionamentu normal parlamentu tomak nian no nune’e loke dalan ba Parlamentu Nasional hala’o duni serbisu ba ita-nia povu no ita-nia rain,” deklara FRETILIN liu husi karta komunikadu ne’ebé www.tempotimor.com asesu, Segunda (01/06).

Tan ne’e, Bankada FRETILIN husu ba deputadu sira ne’ebé dadauk hola funsaun lideransa meza komisaun espesializada sira tenke imediatamente hapara ona sira-nia hahalok boikota iha komisaun hirak ne’ebé sira lidera.

“Se sira lakohi hapara sira-nia áktu boikota sira ne’e, deputadu membru husi komisaun hirak ne’e tenke destitui duni sira no eleje meza komisaun foun atu lori komisaun sira fila fali ba funsionamentu normal,” bankada FRETILIN aviza.

Ba deputadu sira ne’ebé kontiua halo boikota plenaria no komisaun ho razaun katak sira sei kontinua sira-nia pozisaun polítika enkuantu Tribunal Rekursu seidauk pronunsia buat ruma kona-ba keixa hotu ne’ebé sira hato’o ba tribunal.

Tan ne’e, ho tribunal nia desizaun ba keixa sira hotu ne’ebé sira hato’o, laiha ona razaun ba deputadu sira atu kontinua ho hahalok sira ne’e.

“Se sira lakohi hapara, Parlamentu Nasional tomak tenke iha korajen atu hapara sira-nia áktu boikote no paralizasaun hasoru parlamentu”.

“Timor-Leste labele hein tan. Ita-nia povu no ita-nia Nasaun labele hare bebeik mak ita-nia áktu arogansia no drama polítika folin laek sira ne’e. Ita-nia povu no ita-nia Nasaun hakarak no ezije ita atu halo serbisu ne’ebé povu fó fiar ba ita mai tuur iha ne’e atu hala’o”.

Entretantu, Bankada FRETILIN mós fó razaun kona-ba pedidu destituisaun hasoru Sekretaria no Vise Sekretaria Meza PN katak, deputadu balun hatama pedidu refere tanba membru na’in rua ne’e dezde plenaria hahú funsiona normal to’o ohin loron la marka prezensa no halo meza Parlamentu la kompletu.

“Ida ne’e hatudu katak sira iha impedimentu ruma atu hala’o sira-nia knaar, tanba ne’e iha nesidade atu destitui no eleje membru foun rua ne’ebé bele kompleta kompozisaun meza Parlamentu nian no kontribui atu servisu Parlamentu sai di’ak liu tan,” dehan bankada FRETILIN.