Tuir FONGTIL, membru governu ne’ebé barak iha governu ne’ebé lidera husi Primeiru Ministru Taur Matan Ruak ne’e hatudu katak ukun ida ne’e atu fahe de’it poder ba malu hodi garante estabilidade koligasaun.
Hanesan públiku hatene, Lei Organika foun governu konstitusional daualu hatuur membru governu na’in 42 iha PM Taur nia okos, kompostu husi Vise Primeiru Ministru na’in 2, Ministru na’in 19, Vise Ministru na’in 11, no Sekretariu Estadu na’in 10.
Ba kestaun ne’e, Diretor FONGTIL Daniel Santos Carmo hatete, iha governasaun ida bainhira membru governu ne’e barak sei fó implikasaun boot ba kustu operasional.

Nia dehan, ho membru governu na’in 42 ne’e hatudu momoos intensaun atu fahe poder entre partidu FRETILIN, PLP, no KHUNTO hodi bele asegura sira-nia ukun.

"Tanba se sira la halo politika ida atu hamosu membru governu barak par fó ba sira-nia politiku sira asumi kargu, sira bele iha potensia nakfera, entaun ho intensaun politika ida sira halo ne'e atu fahe oportunidade ukun ka fahe kadeira ba malu par labele mosu konflitu iha governasaun," dehan nia iha nia knar-fatin, Kaikoli, Segunda (01/06).

Bainhira governu ne’e ho intensaun atu fahe de’it kadeira, Daniel dehan, governu ne’e sei la hala’o serbisu ho di’ak no ikus mai sei perturba prosesu dezenvolvimentu ba povu no nasaun.

"Membru governu barak iha ita-nia rain maibé serbisu deliberasaun la la'o, signifika membru governu barak maibé la produs rezultadu ne'ebe signifikante," tuir nia.

Tuir nia, loloos la presiza iha membru governu barak, importante mak tenke halo politika ida ne’ebé di’ak hodi bele iha efisiensia no efikasia durante implementa programa no politika hodi servi povu no nasaun.