CNRT: TR Hanesan Pilatus, Fase Liman ba Aktu iha PN

Meza parlamentu Ne'ebe halo rahun husi Deputadu sira iha meadus fulan Maiu (19/5) Meza parlamentu Ne'ebe halo rahun husi Deputadu sira iha meadus fulan Maiu (19/5) Foto Arkivu

Tempotimor (Dili)-Bankada CNRT iha Parlamentu Nasionál konsidera Tribunal Rekursu (TR) hanesan Pilatus ne’ebé fase liman ba aktu hirak kontra lei ne’ebé akontese iha Parlamentu Nasionál.

Deputadu bankada CNRT Gabriel Alves ne'ebé halo leitura ba deklarasaun bankada CNRT nian hatete, desizaun TR hodi indefere petisaun CNRT hanesan loloos ho aktus pilatus iha istoria Jejus.

"Tribunal Rekursu indefere petisaun deputadu CNRT no aliadu sira nian hodi nafatin lakohi tama ba substánsia husi keixa no husu atu hato’o de’it rekursu iha plenária Parlamentu Nasional," dehan Gabriel iha plenária PN, Tersa (02/06).

Tuir Gabriel, deklarasaun TR ne’ebé hatete katak kualker aktu polítiku ne’ebé akontese iha PN  la sujeitu ba kontrolu judisiál no konstitusional nu’udar argumentu ne’ebé la fundamentu no sala, tanba Konstituisaun RDTL artigu 2 númeru 2 no númeru 3 hatete momoos katak aktu ba estadu tomak tenke subordina ba konstituisaun no lei sira.

"Loloos kualker aktus polítiku tenke sujeita ba kontrolu juridisional, hodi respeitu prinsípiu check and balance entre órgaun soberania sira”. 

“Ami nota momoos katak, Tribunal hanesan loos pilatus ne'ebé fase liman hodi deside aktus hotu-hotu iha PN hanesan razaun polítika de’it, nune’e, ami bele dehan katak povu mós bele foti meza PN bainhira sira sente katak reprezenta ona maioria povu tomak, tanba tribunal konsidera katak aktu hada’u poder iha PN ne’e puramente aktu polítiku, laiha efeitu jurídiku tuir ita-nia konstituisaun no lei sira haruka," deklara deputadu Gabriel.

Maske sente katak iha injustisa, maibé deputadu ne’e dehan, Bankada CNRT mós konsiente katak dalan sei naruk atu hetan justisa bainhira mosu disputa legalidade.

“Presedente ne’e hafoer ona ita-nia integridade nu'udar nasaun domokrátiku,” dehan nia.

Deputadu ne’e hatutan, aktu asalta poder ne’ebé halo husi bankada FRETILIN, PLP no KHUNTO hatudu katak TL monu ona ba sistema ditadura.

“Hada’u ukun ne’e bele de'it no ukun bele ho liman besi tanba sei admite husi tribunal,” nia hatete.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.