L-7 dehan, atu hatuur hikas meza PN ne’ebé deputadu sira sobu ona tenke halo tuir lisan Timor nian.
"Ha'u-nia hanoin buat ida ne'ebé ita halo ba nasaun ida ne'e, mak CNRT hanoin, hatete, halo, no prátika. Hanoin aat, hatete aat, halo mós aat, prátika aat mak fila tiha meza. Ne'ebé ha'u atu hatete uluk ita tau meza iha ne'ebá ne'e, ita tau lulik mak ne'e,” dehan L-7 iha plenaria PN, Tersa (02/06).
Tan ne’e, nia afirma, atu hatuur fali meza PN ne’e tenke prepara karau 13.
"Agora ita atu tau fali meza, karau 13, lia-na'in sira mai, karau mutin 6, makerek 7. Se ita la tau, ne'e orsida mate sira mós hader, sira ne'ebé sei moris mós sei hirus, ne'ebé buat ne'ebé kumpre ona ne'e tenke halo duni, keta hatete sala karik konfesa ita-nia sala," nia dehan.
Maske deputadu CNRT mak sobu meza PN ne’e, maibé tuir L-7 labele fó todan de’it ba deputadu sira husi bankada CNRT.
"Ita la'ós hatún CNRT, mais ita tenke hatuur fali, tanba buat sira ne'e mak ami hodi halo funu to'o hetan manan," nia dehan.