Bankada 3 Halo Ona “Limpeza” ba Komisaun Espesializada PN, Guntur mós “Katik”

Parlamentu Nasional Parlamentu Nasional Foto File

Tempotimor (Dili)-Bankada FRETILIN, PLP no KHUNTO realiza duni ona sira-nia politika hodi troka Prezidente Komisaun Espesializada PN ne’ebé durante ne’e deputadu bankada CNRT sira okupa. Aleinde deputadu CNRT, iha mós deputadu bankada PLP ne’ebé tenke “katik” sai husi ninia kargu iha komisaun espesializada.

Deputadu PLP Sabino Soares Guntur ne’ebé durante ne’e okupa kadeira nu’udar Vise Prezidente Komisaun G trata asuntu Edukasaun, Juventude, Kultura no Sidadania tenke husik nia fatin ba deputadu seluk.

Mudansa ba lider komisaun espesializada PN ne’ebé hala’o iha Kuarta (03/06) ne’e hahú ho mudansa ba Komisaun A trata asuntu Konstitusionais no Justisa. Deputadu husi bankada FRETILIN Joaquim dos Santos troka deputada Carmelita Moniz (CNRT) hodi asume kargu Prezidente Komisaun A, enkuantu Vise Prezidente mantein ho deputadu Fransisco Vasconcelhos (PLP).

Iha mós mudansa ba Komisaun D trata asuntu Ekonomia no Dezenvolvimentu ne'ebe molok ne'e lidera husi deputada Virginia Ana Belo (CNRT) no Vise Prezidente Ricardo Batista (CNRT). Komisaun D daudauk ne’e lidera fali husi deputadu Antonino Bianco (FRETILIN) no Vise Prezidente  deputada Olinda Guterres (KHUNTO).

Ba Komisaun E trata asuntu Infra-Estruturas mantein nafatin ho Abel Pires da Silva (PLP) nu’udar Prezidente no halo de’it mudansa ba kargu Vise Prezidente ne’ebé molok ne’e okupa husi Marcos Xavier (CNRT) troka ho Fabiao de Oliveira (FRETILIN).

Ba Komisaun F trata asuntu Saúde, Seguransa Sosiais no Igualdade Jeneru, deputadu Noe da Silva (PLP) ne’ebé molok ne’e nu’udar Vise Prezidente sa’e hodi troka Maria Bareto (CNRT) ne’ebé molok ne’e lidera komisaun. Ba kargu Vise prezidente okupa fali husi deputadu bankada FRETILIN Felix da Costa.

Ba komisaun G trata asuntu Edukasaun, Juventude, Kultura no Sidadania halo mudansa tomak ba estrutura komisaun.

Deputadu Antonio Verdial (KHUNTO) no Deputada Josefa Pereira (FRETILIN) sa’e hodi okupa pozisaun Prezidente no Vise Prezidente ne’ebé molok ne’e asume husi deputada Albina Marcal (CNRT) no Sabino Soares ‘Guntur’ (PLP).

Entretantu, Komisaun B trata asuntu Negósius Estranjeirus, Defeza no Seguransa no Komisaun C Parlamentu Nasional trata asuntu Finansas Publikas seidauk halo mudansa. Tuir planu, mudansa ba komisaun rua ne’e sei hala’o iha Kinta (04/06).

Komisaun B durante ne’e lidera husi Prezidente Komisaun Aderito Hugo (CNRT) no Vise Prezidente Cornelio Gama ‘L-7’ (PLP).

Enkuantu komisaun C durante ne'e lidera husi Prezidente Komisaun Fernanda Lay (CNRT) no Vise prezidente Rosalina Ximenes (PLP).

Rate this item
(1 Vote)
Last modified on Wednesday, 03 June 2020 16:33
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.