Governu Hein Submete OJE 2020 ba PN, sei Deside mós Kalendariu ba OJE 2021

Vise Ministra Finansas, Sara Lobo ko'alia ba jornalista sira Vise Ministra Finansas, Sara Lobo ko'alia ba jornalista sira Foto File

Tempotimor (Dili)-Governu ne’ebé lidera husi Primeiru Ministru Taur Matan Ruak sei hein orariu husi Parlamentu Nasionál atu submete Orsamentu Jeral Estadu (OJE) 2020. Aleinde ne’e, governu mós prepara hela kalendariu ba OJE 2021.

Vise Ministra Finansas Sara Lobo Brites hatete, daudaun ne'e tékniku sira hamutuk ho ministériu seluk halo hela levantamentu dadus ba OJE 2020.

"Kona-ba OJE 2020, hanesan imi akompaña, iha fulan Maiu nia laran, ami aprezenta tiha ona kalendáriu ba KM no hetan ona aprovasaun, entaun oras ne'e dadaun Ministériu Finansas nia tékniku sira halo ona planeamentu orsamentu, hamutuk ministériu sira seluk hodi halo levantamentu ba dadus," dehan Sara iha Palásiu Governu, Kuarta (03/06).

Vise MF ne’e dehan, pratikamente orsamentu ba tinan 2020 ba de'it tinan ida, maibé ezekusaun kuaze la'o tiha ona ho duadésimu nune’e governu sei habadak prosesu barak, liu-liu prosesu sira hanesan jornada orsamentu, inklui komite revizaun orsamentu mós sei la realiza, signifika para, hodi bele kumpre kalendáriu ne'ebé aprova tiha ona katak 30 Jullu KM aprova OJE 2020.

Kona-ba atu submete OJE 2020 ba PN, Sara dehan, ne’e depende ba koordensaun entre Ministru Asuntu Parlamentár no Komunikasaun (MAPK) ho PN.

"Iita mós hatene katak PN sei iha periodu resesaun, ne'ebé mak ovemente akontese iha Jullu to'o Setembru 2020, entaun ami hein hela orden husi MAPK par fó hatene data fixu, nune'e MF liu husi Primeiru Ministru (PM) hodi submete OJE 2020 nia ba PN," nia dehan.

Hatan kona-ba montante OJE 2020, Vise MF ne’e dehan seidauk bele divulga tanba sei iha hela faze preparasaun.

"Montante OJE 2020 nian ha'u seidauk bele divulga, tanba sei iha faze inísiu, mas sertamente despeza sira ne'ebé durante ne'e akontese ona iha periodu duadésimu, ita sei enkuadra hotu, pois asegura mós despeza durante fulan tolu iha tinan rohan, purtantu, ami seidauk iha ninia dadus finál, maibé ita-nia preparasaun orsamentu ne'e OJE 2020 no OJE 2021 nian dala ida de'it, entaun agora dadaun ami fokus hela ba OJE 2020," dehan vise MF ne’e.

Posibilidade, tuir Sara, iha semana oin MF sei aprezenta kalendáriu OJE 2021 nian ba KM.

"Kalendáriu ba OJE 2021 sei hein lai membru governu foun simu tan tiha lai pose, provavelmente semana oin mak foin aprezenta kalendáriu par ministru foun sira hotu iha ona laran, hafoin mak ita hahú ninia prosesu. Ne'ebé prosesu simultanemente rua dala ida, maibé ninia kalendáriu mak diferente, tanba kalendáriu submisaun OJE 2021 iha 15 Outubru."

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.