Tuir Diretór ezekutivu BNCTL Brigido de Sousa katak, BNCTL simu ona osan tokon $59.6 ne'ebé MF transfere mai.
"Orsamentu ne'ebé atu apoiu ba familia agregadu sira ne'ebé Ministériu Finansas (MF) transfere ona mai BNCTL iha 1 juñu, hamutuk tokon $59.6, ne'ebé sei halo pagamentu ba suku 434 la inklui RAEOA," dehan Diretór Ezekutivu BNCTL Brigido de Sousa iha salaun MSSI, Kuarta (03/06)
Nia afirma, tokon $59.6 ne'ebé BNCTL simu, hahú transfere ona ba suku sira ne'ebé konta bankária iha BNCTL.
"Osan tokon $59.6 ne'e, agora dadauk hatam ona ba konta bankária ne'e suku sira iha BNCTL. Entaun BNCTL nia responsabilidade mak oinsa uza osan ne'e hodi halo pagamentu ba ekipa pagamentu sira iha nivél postu-administrativu no suku, sira, depois mak ekipa pagamentu kada suku ne'e mak sei halo fali pagamentu ba benefisiáriu sira iha suku no aldeia," dehan Brigido.
Entretantu loron ne'ebé BNCTL atu halo pagamentu ba ekipa pagamentu sira mak loron 8 to'o 10 juñu 2020.
"BNCTL iha loron tolu ba pagamentu tuir oráriu ne'ebé ami konkorda hod Diretór Jerál Ministériu Solidariedade Sosiál no Inkluzaun mak iha loron 08/06 to'o loron 10/06 semana oin. Entaun signifika iha loron tolu nia laran ne'e BNCTL selu hotu ona ekipa pagamentu sira para loron tuir mai, ekipa sira ba halo fali pagamentu ba benefisiáriu sira iha suku no aldeia," nia dehan
Entretantu transporte sira ne'ebé atu transporta orsamentu ba apoiu umanitáriu ne'e hotu husi BNCTL, hafoin to'o ona iha munisípiu sira mak uza fali transporte husi Ministériu Solidariedade Sosiál no Inkluzaun nian hodi ba halo pagamentu iha suku no aldeia sira.
Iha fatin hanesan hanesan Diretór Jerál Ministériu Solidariedade Sosiál no Inkluzaun (DJ-MSSI) Rui Exposto katak, durasaun ba pagamentu iha loron 14.
"Loron pagamentu nia barak liu mak loron 14, maibé ami kompromete katak, iha suku balun ne'ebé populasaun oituan no pagamentu hotu sedu, ami sei apoiu ekipa sira ba suku seluk atu bele aselera prosesu pagamentu ne'e tuir kalendáriu ne'ebé ita trasa ona," nia dehan.
Entretantu transporte ne'ebé atu fasilita tékniku sira iha munisípiu hodi halo pagamentu ba benefisiáriu sira, MSSI hetan apoiu husi partimóniu estadu ho kareta 181, maibé se la to'o maka ekipa MSSI sei halo aluger ba kareta seluk hodi fasilita tekniku sira.