Fabião Hakarak Hadia Servisu Iha Komisaun E

Vise-Prezidente Komisaun E Parlamentu Nasionál Fabião de Oliveira Vise-Prezidente Komisaun E Parlamentu Nasionál Fabião de Oliveira Foto Suplai

Tempotimor (Díli)- Vise-Prezidente Komisaun E Parlamentu Nasionál Fabião de Oliveira hatete, halo mudansa ba meza Parlamentu Nasionál to'o mai komisaun espesializada sira atu hadi'a di'ak liu tan servisu ba oin.

"Horseik kompleta meza Parlamentu Nasionál, entaun ohin kontinua halo mudansa ba komisaun espesializada sira", dehan Nia iha Parlamentu Nasionál, kuarta (03/06).

Nia dehan, ohin halo mudansa ba Komisaun sira, bazeia ba desizaun polítika, oinsá atu hadi'a servisu sira ne'ebe durante ne'e hala'o ona, maibé iha balun seidauk di'ak.

"Ohin iha Komisaun E Parlamentu Nasionál ami halo deliberasaun ida hodi eleitu fila-fali Vise-Prezidente komisaun F, entaun tuir knaar Parlamentu Nasionál nian mak ida Lejisladór, Fiskalizadór no desizaun polítika iha ohin halo mudansa ba komisaun espesializada sira ne'e, fas parte ba desizaun polítika", tenik Nia

Deputadu atuál no Vise-Prezidente foun Komisaun E PN Fabião de Oliveira afirma, ho desizaun finál komisaun E nian, ohin Prezidente Komisaun mantein deputadu Abel Pires da Silva husi bankada PLP no halo de'it mudansa ba Vise-Prezidente komisaun E Parlamentu Nasionál.

"Ohin mudansa ba de'it Vise-Prezidente komisaun E no Prezidente nafatin, ha'u sai fila-fali Vise-Prezidente tuir desizaun hotu-hotu", Nia salienta

Deputadu Fabião akresenta, ohin halo eleisaun ba mudansa komisaun E Parlamentu Nasionál ne'e, marka prezensa mos husi deputadu Marcos Xavier husi bankada CNRT ne'ebé antes ne'e hanesan Vise-Prezidente komisaun E no ho nia aliadu sira, husi UDT no fó mos apoiu.

"Ohin votasaun ne'e partisipa mos husi deputadu CNRT? Nia hatan sim iha mos partisipasaun husi Vise-Prezidente sesante ho nia aliadu sira husi UDT no fó apoiu mos vota afavor ba eleitu Vise-Prezidente komisaun E foun", Nia relata

Deputadu husi bankada FRETILIN ne'e mos dehan, ohin sai Vise-Prezidente ba Komisaun E Parlamentu Nasionál iha prioridade atu halo mak elabora orsamentu komisaun nian, halo fiskalizasaun no avaliasaun.

"Ohin prioridade ha'u aprezenta ba iha membru Komisaun, primeiru mak agora tenke halo diferensa oitoan iha komisaun E, urjente ne'ebé ami atu halo mak elabora planu ba orsamentu komisaun E, segundu fiskalizasaun no fiskalizasaun ne'e mos fahe ba parte rua, ida fiskalizasaun ba Ministériu relevante ne'ebe servisu iha relasaun ho komisaun E liu-liu iha administrasaun jestaun i mos tun ba tereñu atu haree projetu sira ne'ebé Orsamentu Jerál Estadu finansia", Nia esplika

Nia hatutan, "kona-bá avaliasaun durante ne'e komisaun E hala'o nia knaar no relatóriu mensál, trimestrál no anuál buat hirak ne'e hotu ami sei foti desizaun deliberasaun ida, aban kinta feira aprova ami nia planu sira ne'e par halo implementasaun",

Nia esklarese, halo mudansa ba meza Parlamentu Nasionál atu kontinua servisu no hadi'a diak liu tan servisu hotu, liu-liu iha komisaun E Parlamentu Nasionál.

Antes ne'e, Komisaun E Parlamentu Nasionál ne'ebé trata asuntu Infra-Estruturas lidera husi Prezidente Komisaun deputadu Abel Pires da Silva husi bankada PLP no Vise-Prezidente deputada Marcos Xavier husi bankada CNRT.

Rate this item
(0 votes)
Last modified on Thursday, 04 June 2020 08:52
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.