Tama iha Lista MG Foun, Fernando Gusmão Prontu Servi

Prezidente PDN, Fernando Gusmao, ko'alia ba Jornalista sira iha UNPAZ Dili (4/6) Prezidente PDN, Fernando Gusmao, ko'alia ba Jornalista sira iha UNPAZ Dili (4/6) Foto Tempo Timor

Tempotimor (Dili)-Tuir informasaun, Prezidente Partidu Dezenvolvimentu Nasional (PDN) Fernando Gusmão tama iha lista kandidatu membru governu (MG) foun ne’ebé Primeiru Ministru prepara hodi aprezenta ba Prezidente Repúblika Francisco Guterres Lu Olo.

Fernando Gusmão la’os figura foun iha mundu politika. Molok harii PDN, Fernando tama iha estrutura Partidu Sosial Demokrata (PSD) ne’ebé lidera husi saudozu Mario Carrascalão. Fernando Gusmão mós uluk reprezenta PSD hodi tuur iha Parlamentu Nasionál.

Relasiona ho informasaun kona-ba nia naran tama iha lista MG foun, atual dosente iha Universidade da Paz (UNPAZ) ne’e la deklara katak nia tama duni lista ka lae, maibé nia dehan katak, nu’udar Timor-oan prontu fó apoiu ba governu konstitusional daualu tuir koñesimentu ne’ebé nia iha.

"Nu'udár Timor-oan iha esperensia uitoan sempre prontu atu kontribui kuandu na’i-ulun sira presiza husu ita-nia apoiu," dehan Fernando iha knar fatin UNPAZ, Manleu, Kinta (04/06).

Prezidente PDN ne’e dehan, bainhira lider sira la husu atu fó apoiu mós nia nafatin fó kontribuisaun ba nasaun Timor-Leste liu husi kapasita estudante sira iha kareira universidade hodi prepara ba futuru nasaun nian.

"Kuandu la envolve iha governu mós kontinua nafatin iha universidade hodi hanorin nafatin ita-nia alin sira no fó nafatin informasaun siensia ninian ba sira, ho esperensia ne'ebe ita iha hodi forma sira par aban-bainrua bele troka lider sira-nia fatin, kuandu tempu to'o," dehan nia.

Iha parte seluk kuadru no militante balun husi Partidu sira ne'ebe asegura hela VIII Governu hato'o sira nia diskordansia no lamentasauniha rede sosial facebook kona ba desizaun kuadru superior husi partidu PLP no FRETILIN nian.

"Partidu ne'e kala nia ema la iha los ona, ba lamas los partidu seluk maka mai.....," dehan iha status membru ida husi partidu ne'ebe agora apoia asegura VIII Governu ne'e.

 

Rate this item
(3 votes)
Last modified on Thursday, 04 June 2020 16:58
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.