Fernando Gusmão: MG Barak ne’e Normal, Importante La Korruptu

Prezidente PDN, Fernando Gusmao Prezidente PDN, Fernando Gusmao Foto Tempo Timor

Tempotimor (Dili)-Prezidente Partidu Dezenvolvimentu Nasional (PDN) Fernando Gusmão hatete, númeru membru governu iha governasaun ida ladun fó impaktu ba orsamentu estadu.

Prezidente PDN ne’ebé mós tuir informasaun tama iha lista membru governu (MG) foun deklara kestaun ne’e relasiona ho preokupasaun balun ba númeru MG iha governu daualu ne’ebé atinze 44, inklui PM.

Tuir lei organika foun, governu daualu sei kompostu husi Primeiru Ministru ida, Vise Primeiru Ministru 2, Ministru 20, Vise Ministru 11, no Sekretariu Estadu 10.

Ba númeru ne’e, Fernando dehan, númeru membru governu iha impaktu uitoan ba orsamentu estadu.

"Kona-ba membru governu barak ninia impaktu ou lae, tuir ha’u-nia hanoin iha impaktu mais la boot, mais ida ninia impaktu boot mak korupsaun ne'e, tanba korupsaun ne'e halakon osan estadu nian milloes ba milloes, entaun ita tenke hadi'a jestaun orsamentu, ne'e mak importante,",  dehan Fernando iha nia knar fatin, UNPAZ, Manleu, Kinta (04/06).

Tuir nia, governu hamosu membru barak tanba bazeia ba governu ninia vizaun atu dezenvolve nasaun.

"Membru governu barak ne'e depende ba organika kada governu ninian, tanba governu ida sempre iha sira-nia nia vizaun oinsa mak atu hala'o sira-nia governasaun, entaun husi ida ne'e mak sira termina númeru governu hira," katak nia.

Importante, nia afirma, governu presiza hadia jestaun no administrasaun ne'ebé hamosu korrupsaun hodi halakon osan estadu nian.

Se governu konsege halo ida ne’e, Prezidente PDN ne’e fiar katak governu bele garante ona dezenvolvimentu iha TL.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.