Vise Xefe Bankada CNRT iha Parlamentu Nasionál Patrocino dos Reis Fernandes hatete, membru CNRT iha governu seidauk retira tanba sei hein membru governu foun simu pose no sei prepara sira-nia relatoriu serbisu.
"Ita mós haree katak, faze daruak ba toma pose ne'e mós seidauk, entaun hanoin katak, parese sira (MG CNRT) sei halo serbisu par prepara sira-nia relatóriu hodi membru governu foun toma pose ona, sira mós entrega, handover, ida ne'ebé di'ak," dehan Patrocino iha PN, Segunda (08/06).
Tuir nia, MG CNRT sira labele husik de’it sira-nia serbisu tanba serbisu ne’ebé sira halo estadu nian.
"Tanba sasan estadu nian, ita tenke halo ho responsabilodade. Maibé pozisaun governu nian ne'e klaru ona, tanba membru governu husi CNRT tenke rezigna an, se hakarak kontinua tenke hakotu ligasaun ho partidu."
Deputadu ne’e dehan, membru governu CNRT hatama hotu oba karta rejignasaun ba Primeiru Ministru no sei hein hela atu Prezidente Repúblika ezonera sira.
"Buat ne'ebé ita hatene katak sira enrega hotu ona karta rezignasaun ba PM Taur Matan Ruak, depois mak PM haruka lista sira ne'e ba Prezidente Repúblika. Tanba ema ne'ebé bele hapara ka hasai membru governu ida, ne'e so PR mak dekreta no ezonera, ne'ebé agora hein hela," nia dehan.