Vise Xefe Bankada CNRT Partrocino dos Reis Fernandes hagtete, FRETILIN ba viabiliza governu, maibé sira-nia membru iha governu barak liu.
"Ba ha'u mós dehan katak postura governu ne'e boot duni, tanba nia boot liu inísiu governu daualu ne'ebé iha de'it 40 membru governu, maibé agora ne'e sira aumenta tan vise-PM na'in rua depois pasta foun seluk ne'ebé parese boot," dehan nia iha PN, Segunda (08/06).
Maske nune’e, deputadu ne’e dehan, kompozisaun governu boot ka kiik la'ós kestaun, maibé kestaun mak serví povu ka lae.
"Bbuat importante ba ita mak pasta sira kria ne'e atu koresponde duni ba povu nia nesesidade ka lae, depois kapasidade atu ezekuta programa ka lae, Maibé ita ko'alia ida ne'e naruk tanba governu atuál nia programa laiha."
"Ha'u mós sente alerjia uitoan, mais ha'u haree hanesan membru governu husi FRETILIN mak barak liu, mais ida ne'e normal tanba, namadigas kadeira 23 tenke subordina fali ba kadeira 8 no kadeira lima, mezmu FRETILIN mai dehan atu tonka, mais ha'u mós la fiar katak mai tonka fali kadeira 8 no lima ne'e imposivel," dehan nia.
Ba kestaun ne’e, Vise Xefe Bankada FRETILIN iha PN, Francisco Miranda Branco dehan, membru governu husi FRETILIN iha governu daualu la barak.
"Governu anteriór mós iha kompozisaun governu boot ka liu membru governu 40 resin, ne'ebé uluk hotu-hotu kestiona, maibé agora ne'e, ida ne'e mak konsertasaun polítika partidu hotu ne'ebé envolve iha laran," dehan nia.
Kona-ba kargu Vise PM na’in rua, deputadu ne’e dehan, kargu ne’e la'ós gengsi, maibé atu serví povu.
"Vise Primeiru Ministru primeiro ne'e tutela ba Ministra Solidariedade Sosiál no Inkluzaun (MSSI) no vise PM segundu ne'e tutela ba Ministru Planu Ordenamentu Teritoriál (MPOT), ne'ebé servisu iha, ne'ebé informasaun dehan gengsi ne'e laiha ida, tanba ita atu serví povu no nasaun ne'e haluhan tiha lia-fuan ida gengsi ne'e," nia dehan.
Kona-ba lideransa parlamentár, tuir Branco tenke mai husi bankafa FRETILIN duni, tanba hetan apoiu maiória.
"Lideransa parlamentár tenke husi FRETILIN duni, tanba husi maiória nia konfiansa, entaun ami simu responsabilidade ida ne'e, depois membru governu ne'e la'ós barak liu karik, imi konta halo nusa mak barak liu fali ne'e, imi sura mak sala karik," nia dehan.
