Print this page

Abilio: Ami Sei Hakat Fronteira Prontu Mate Ho Kilat Musan

Autoridae Defesa no Seguransa akompana porta voz SIJK wainhira visita ba fronteira foin lalais ne'e Autoridae Defesa no Seguransa akompana porta voz SIJK wainhira visita ba fronteira foin lalais ne'e Foto Pajina FB Ministeiru Saude

Tempotimor (Dili)-Estudante Timor oan naun bolseiru ne'ebé ba hala'o estudu iha nasaun viziñu Indonézia halo ameasa ba estadu Timor-Leste katak, kuandu estadu la atende sira nia nesesidade ho di'ak, maka estudante sira ne'e prontu hakur fronteira rai no prontu simu kilat musan husi Unidade Polísia Fronteira (UPF).

"Governu mak la iha solusaun di'ak ba ami nia problema ka preokupasaun mak ami prontu atu ba korta fronteira rai hodi simu kilat musan ka kastigu husi ami nia instituisaun estadu RDTL nian rasik, tanba ami sente mate ka terus ne'ebé ami simu husi institusaun RDTL ne'ebé povu rasik harii ne'e di'ak liu duké terus mesak iha rai liur'" haktuir portavoz estudante la'ós bolseiru iha Indonesia Abilio da Costa Freitas iha komunikadu Imprensa ne'ebé tempotimor.com hetan, segunda (08/06).

Portavoz ne'e mós dehan, estudante la'ós bolseiru sira iha Indonézia sente diskriminadu tanba, sira hetan de'it subsidiu dolar $100, maibe iha nasaun balun hetan to'o dolar $1.000.

"Montante subsidiu ba estudante iha nasaun ida ho nasaun seluk la hanesan, tanba hahú husi $100 to'o $1.000, entaun ami estudante la'ós bolseiru sira iha Repúblika Indonesia sente lamentavel ho montante ne'ebé fó sai iha Jornal da Repúblika, iha loron 5 fulan Juñu 2020 katak, kada estudante sei simu $100 ho montane orsamentu sira ne'e, ami estudante husi nasaun Indonesia sente Governu halo deskriminasaun boot ida ba ami," dehan Abilio.

Ho desizaun governu nian ne'e, maka estudante aira husu ba governu Timor Leste atu tetu didi'ak montante orsamentu ba estudante la'ós bolseiru sira, tanba nesesidade báziku presiza tebes.

"Ezije ba governu atu tetu didi'ak montante osan ne'ebé atu aloka ba estudante sira iha rai liur, liu-liu Indonesia, tanba nesesidade báziku presiza barak tebes no subsidiu ne'ebé governu fó sai iha Jornal da Repúblika ho montante $100 sei la rezolve no la garantia ba ami nia vida moris iha nasaun viziñu ne'ebé afeitadu ho pandemia Covid-19," nia dehan.

Estudante sira ne'e mós ezije ba orgaun estadu sira hanesan Parlamentu Nasionál, Governu no Prezidente Repúblika atu ko'alia liafuan ruma ne'ebé garantia ba estudante la'ós bolseiru sira iha Indonézia nia vida.

"Husu ba governu no estadu RDTL atu tau sériu ba iha situasaun estudante sira ne'ebé moris iha nasaun afeitadu sira hodi garantia estudante sira nia vida. Hadi'a sistema servisu hodi atende estudante sira iha rai liur nian, hanesan problema viza, tratamentu saude karik afeta covid-19, no seluk tan," estudante sira afirma.

Portavoz ne'e mós husu ba governu TL atu defune loloos estudante sira iha estranjeiru ne'ebé iha direitu atu hetan subsídiu husi governu.

"Defini lolos estudante ne'ebe atu hetan subsidiu, tanba durante ne'e governu la define klaramente kona-ba se mak atu hetan loloos subsidiu. Tanba Tuir ami nia hatene estudante sira iha Indonézia ne'e mak hanesan, etudante la'ós bolseira, estudante bolsa parsiál no estudante bolseiru, tanba ne'e tenke define ho klaru, tanba to'o agora estudante balun osan laiha ona," Nia salienta.

Estudante sira ne'e mós husu governu atu responsabliza ba sira nia polítika ne'ebé sempre dehan, povu mak riku soin númeru dahuluk, entaun husu governu atu atende estudante sira la'ós bolseiru sira iha Indonézia inklui nasaun seluk ho lalais, tamba estudante barak mak presiza ona.

Rate this item
(19 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items