Tempotimor (Dili)-Eis Prezidente Repúblika José Ramos Horta kontra politika Ministru Justisa Manuel Carceres ne’ebé altera kodigu prosesu penal no reativa hikas proposta lei kona-ba kriminaliza defamasaun.
Ramos Horta husu ba Ministru Justisa atu di’ak liu fó prioridade ba Lei Terras Propriedade la’os book fali lei kriminaliza defamasaun.
"Ha'u apela ba Ministru Justisa Manuel Carçeres atu fó uluk prioridade ba Lei Terras Propriedade no husu ba señor ministru rai lai lei kriminaliza defamasaun iha gaveta laran no lalika lori ba Konsellu Ministru, maibé karik lori ona ba KM, mak ha'u husu ba Primeiru Ministru Taur Matan Ruak atu kansela lai lei ne'e, tanba ne'e PM mak ukun, hein to'o tinan 2023 mak deskute fali," dehan Horta ba ba www.tempotimor.com iha nia rezidensia Metiaut, Dili, Tersa (09/06).
Horta afirma, di’ak liu Ministru Carceres fó liu importansia ba lei rai ne’ebé dala-barak hamosu konfuzaun no serbisu sira seluk.
“Nusa la tau atensaun ba pasaporte sira, nasionalidade, serbisu barak loos no serbisu ne'ebé tinan rua ka tolu nian to'o agora seidauk bele rezolve, ne'e saida mak ne'e," dehan Horta.
Horta dehan tan, di’ak liu MJ hadi’a uluk kondisaun prizaun sira duke halo uluk lei ne’ebé sei hamosu rezistensia iha rai laran no hamonu TL nia naran iha mundu internasionál.
“Di'ak liu fokus ba serbisu ba povu duké halo lei ne'ebé halo ita gasta enerjia ba hatán problema. Timor-Leste nia independénsia ne'e premiu ida ke kompletu ho liberdade espresaun, liberdade organizasaun no liberdade imprensa. Nune'e ema hotu iha direitu atu hato'o krítika hasoru polítika ne'ebé la loos. Se polítiku ida tauk ema krítika entaun lalika tama vida polítika,” dehan premiadu nobel da pas ne’e.
Tuir Horta, nia kontra kriminaliza defamasaun tanba bele fó impaktu la di’ak ba esforsu kombate Korrupsaun, Koluizaun no Nepotizmu.
Horta hatutan, bainhira governu konsege duni kriminaliza defamasaun mak sei proteje naran di'ak governante balun, politikus sira no deputadu balun iha Parlamentu Nasional nune'e tau limite ba serbisu jornalista, estudante universitáriu, no akademiku sira.
“Jornalista sira sei tama kadeia no estudante sira sei susar atu halo seminariu ruma,” nia hatete.
