Vise MF ne’e hatete, objetivu husi governu oferese $100 ne’e atu bele apoiu familia ne’ebé laiha kbiit no familia sira ne’ebé simu salariu kada fulan menus husi $500.
"Ttuir loloos ema ne'ebé saláriu dolar $500 ba leten tenke konsiente katak nia labele ba forma fali ka ba hatama naran," dehan Sara ba jornalista sira iha Palásiu Governu, Kuarta (10/06).
"Ha’u hanoin iha prosesu sira futuru ne'e evita ona buat ne'ebé ita bolu katak hili oportunizmu ka oportunista ne'ebé mak aproveita situasaun ne'ebé akontese," dehan nia.
Tuir nia, loloos ema ho salariu $500 ba leten labele simu subsidiu, maibé tanba prosesu ne’e iha tempu badak de’it nune’e MSSI ho MAE la konsege identifika loloos ema ninia rendimentu mensal.
"Meiu ne'ebé sira halo mak filtrajen, mais ida ne'e karik la másimu, tanba ita selu ne'e ba uma-ka'in depois xefe familia mak naran iha ne'ebá," nia dehan.
Iha parte seluk, vise Primeira Minsitra dahuluk Armanda Berta dos Santos dehan, sidadaun ne'ebé hetan saláriu dolar $500 kada fulan bele hetan subsídiu, maibé sira ne’ebé ho salariu $501 ba leten labele hetan.
"Ha’u sujere atu sira ne’ebé mak salariu kada fulan mak $501 ba leten di’ak liu lalika simu. Tanba parte legal hatuur ona iha diplom ministerial konjunta MSSI-MAE, katak ema ne'ebé rendimentu dolar $500 mai kraik mak merese hetan (subsidiu) maibé sira ne’ebé mak Iiu $500 ne’e laiha direitu atu hetan subsidiu husi governu," dehan nia.