Maski nune’e esbozu lei ne’e rasik to’o oras ne’e Cerceres seidauk bele eprezenta ba Konsellu Ministru tanba sei fó tempu atu halo konsulta pubilka ho entidade hotu.
"Governu iha konsiderasaun tebes ba sosiedade Sivil, Igreja no ba entidadede hotu. Tanba ne'e, governu fahe esbosu ida ne’e ba entidade hotu atu husu sira nia opiniaun. To’o oras ne’e, ha’u seidauk simu resposta husi entidade ruma", dehan Carceres hafoin reuniaun Konsellu Ministru iha palásiu governu, Kuarta (10/06).
Ministru ne’e hatutan, bainhira koalia kona-ba setor judisiariu atu halo lei ida ba iha organizasaun judisiariu iha implikasaun ba kodigu penal, kodigu prosesu penal, kodigu sivil no kodigu prosesu sivil atu bele haan malu ho lei organizasaun judisiariu nian.
“Tanba ne'e mak ida ne'e hanesan inisiativa ida atu husu sosiedade sivil, igreja no matenek sira-nia hanoin oinsa, ne'ebe Lei ne'e la'os aprova ona, lae," dehan nia.
Kona-ba kritika ne’ebé fó relasiona ho esbosu lei defamasaun ne’e, Carceres hatete, nu’udar ministru nia labele resposta deklarasaun ne’ebé fó sai liu husi konferensia imprensa.
"Ministru labele responde ba konferensia imprensa tanba ha’u konsidera parseiru sira ne'e no haruka ona karta ofisial hodi husu sira-nia hanoin, ne'ebé ha’u mós hein hela sira-nia hanoin mai mós tenke ofisial.”
Tuir nia, esbosu lei defamasaun ne’e foin hanesan inisiativa ida husi governu tan ne’e governu husu mós entidade sira nia hanoin.
"Ha’u rona opiniaun la'os sala maibé ha’u hein opiniaun, favor ida se governu husu opiniaun ho hakraik an hato'o imi-nia hanoin mai atu tau hotu opiniaun, agora ita diskute malu liu fali husi konferensia imprensa ne'e laiha konkluzaun."
"Ha’u hein nafatin no ha’u iha esperansa katak sosiedade sivil hato'o ofisialmente ideia sira par depois ha’u tetu ideia sira ne'e hotu, kuandu ida ne'ebé labele ita dehan labele," dehan nia.