Primeiru Ministru Taur Matan Ruak fó ninia hanoin kona-ba polemika ba Lei Difamasaun ne’ebé mosu iha sosiadade.

Tuir PM Taur, esbosu lei difamasaun sosiadade sei deskuti, maibé presiza halo separasaun liberdade espresaun ho insultu.

"Diskusuan ne'e ita husik ba tanba sosiedade sei diskute, ha'u hanoin ita husik par sosiedade diskute. Agora kestaun rua ne'ebé mak ita tenke distinge mak entre liberdade espresaun ka direitu ema nian atu ko'alia, no mós kona-ba insultus, desrespeitu be ema-nia naran, ida ne buat rua ne'ebé la hanesan, tanba direitu fundamentais ema nian," dehan PM Taur ba jornalista sira iha Palásiu Prezidensiál Bairu-pite Dili, Segunda (15/06).

Tuir Xefe Governu ne’e, presiza halo separasaun ba prinsipiu importante sira, tanba demokrasia no respeitu la hanesan.

"Portantu entre respeitu ho demokrásia ne'e buat rua ne'ebé la hanesan, tanba ne'e ha'u hakarak atu sosiedade diskute lai, depois mak ita haree," dehan PM Taur.

Iha 2017, PM Taur matan Ruak ne'ebe iha momentu ne'eba nu'udar Prezidente da Republika hatudu ninia opozisaun maka'as ba kazu kriminalizasaun ba difamasaun kontra jornalista Raimundo Oki.

"Lala'ok ne'e, karik ita bo'ot hanoin fila fali, tuir ita.....kona ba ita bo'ot nia deklarasaun forte relasiona ho ita nia apoiu ba liberdade de imprensa no ita nia opozisaun ba prosekusaun Oki nian," dehan iha karta petisaun IFJ nian ne'ebe haruka ona ba PM taur iha semana kotuk.