Molok ne’e, iha ona sujestaun balun husi deputadu sira atu PN hatama fila fali osan refere ba kofre estadu bainhira la utuliza.
Hafoin mosu mudansa politika, PN deside hodi uza osan refere ba atividade fiskalizasaun ba asuntu Covid-19, maibé to’o ohin loron orsamentu refere sei ‘rai metin hela’, ho nune’e, mosu tan hanoin atu lori fila rihun $500 ba kofre estadu.
Deputada bankada FRETILIN Maria Angelica hatete, to’o ohin loron PN seidauk ezekuta osan rihun $500, tan ne’e iha ona hanoin atu halo proposta alterasaun hodi hatama fila fali osan refere ba kofre estadu.
"Orsamentu $500 mill ne'e seidauk ezekuta, tanba ne'e ami-nia komisaun iha ona hanoin ida atu halo proposta alterasaun ida hodi hama hotu ba kaixa teizoru," dehan deputada Angelica iha PN, Tersa (16/06).
Nia argumenta, osan refere sei lori fila ba kofre estadu tanba PN laiha atividade hodi utuliza.
"Elimina katak osan ne'e ba kaixa teizoru la'os ba Parlamentu Nasional ho razaun tanba osan iha ne'e ami atu halo saida", tenik Nia
Tuir planu, deputada ne’e dehan, iha 21 Juñu, sei hatama proposta alterasaun.
Kona-ba atividade fiskalizasaun, Angelica dehan, PN sei utuliza orsamentu duadesimu ne’ebé aloka ba PN.
