Berta hato’o deklarasaun ne’e relasiona ho kritika balun husi sosiadade kona-ba pagamentu ne’ebé la’o kleur tebes.
"Pagamentu ba agregadu familiar la'o tarde, tanba buat hotu prosesu preparasaun kleur atu pagamentu mós bele la'o di’ak tanba ne'e mak atraza duni, maibé importante mak $100 dolar ne'e bele to'o ba ita nia uma-ka'in sira," dehan Berta hafoin hasoru-malu ho Primeiru Ministru Taur Matan Ruak iha palasiu governu, Tersa (16/06).
Hatan kona-ba per diem $40 kada loron ba ekipa MSSI ne’ebé fahe subsidiu, Vise PM ne’e dehan, funsionariu sira ne'ebe fahe subsidiu ba agregadu familiar ne'e parte teknika nune'e merese duni sira bele hetan tuir dokumentu ne'ebé hatur ona.
"Ha’u hanoin pagamentu ne'e loron ne'ebe hatur tiha ona tuir orariu, tanba ne'e mak buat ne'ebé implementa iha terenu teknika sira tuir de'it buat ne'ebe iha ona no buat ne'ebé sira hetan mós tuir saida mak hatur ona," dehan nia.
Maske nune’e, nia dehan, parte governu prontu atu hadia bainhira per diem ne’e la merese no labele repete tan.
"Se karik ba oin haree problema ruma presiza tuur hamutuk par rezolve no ida ne'e mak la merese entaun sira bele redus ho situasaun sira ne'e," dehan nia.