Print this page

CNRT Konsidera Governu Defaktu, FRETILIN “Raan Nakali”

Plenaria Parlamentu Nasional Plenaria Parlamentu Nasional Foto Tempo Timor

Tempotimor (Dili)-Gov ernu Konstitusional daualu ne’ebé lidera husi Primeiru Ministru Taur Matan Ruak nakfilak sai governu defaktu ba deputadu CNRT sira iha Parlamentu Nasionál, nune’e halo deputadu husi bankada FRETILIN “raan nakali”.

Deputada Bankada CNRT Veneranda Lemos hato’o kritika ba governu no hatete mós katak governu ida ne’e nu’udar governu defaktu hodi fo lembra hikas malisan husi bankada opozisaun FRETILIN hatu'ur husi periodu 2007-2012.

“Kualidade governu defaktu mak ida ne'e laiha preparasaun. Ministru Finansas defaktu, Fernando Hanjam, mai lee dokumentu ketak ida no (fó) Parlamentu Nasional dokumentu ketak ida, Ministru Finansas dezde horseik kedas mai kanta, maibé laiha dokumentus ida ne'ebé halo ema atu intende didi’ak saida mak governu defaktu atu halo, ita la komprende, ida ne'e mak governu ninia kapasidade ezekusaun.”

"Ministra Saúde defaktu mós laiha preparasaun atu lori ninia relatoriu mai hato'o, keta iha konfuzaun karik tenke aprende didi’ak par lori mai aprezenta, tanba Parlamentu Nasional mak atu aprova levantamentu ba fundu mina nian ka osan atu gasta," deklara Veneranda iha ninia intervensaun ba audensia publika kona-ba levantamentu estraordinéria fundu petroliferu, iha Parlamentu Nasional, Tersa (16/06).

Deputada ne’e mós kritika relatoriu ezekusaun ne’ebé Ministra Saúde Odete Maria Freitas Belo hato’o iha plenaria, tanba tuir nia relatoriu refere kria konfuzaun.

"Ministra Saúde defaktu Odete Maria Freitas Belo ohin dehan katak, orsamentu aloka ba Covid-19 ne'e $49 milloes, ha’u haree iha dokumentus ne'ebé Ministru Finansas defaktu provendensia horseik orsamentu ne'e iha $57. 9 milloes, foin gasta de'it $1 millaun ital, ezekusaun mak ida ne'e ka? Gastu la hotu depois mai husu tan, ita la hatene osan ne'e atu ba ne'ebé no mai husu tan atu halo saida? Ida ne'e ha’u sidauk liga ba Ministeriu sira seluk, tanba ne'e ha’u hanoin di’ak liu Ministru defaktu sira buka informasaun, aprende halo didi’ak depois mai aprezenta fila-fali, se lae mai ko'alia manggame de'it."

Iha fatin hanesan, deputadu husi bankada FRETILÍN Antonino Bianco la simu ho lia-fuan defaktu husi deputada CNRT.

"Opozisaun defaktu ko'alia governu defaktu ne'e la hakerek iha konstituisaun, maibé ema mós hakarak dehan opozisaun defaktu, tanba iha konstituisaun laiha ona defaktu," dehan nia.

Tuir nia, governu ne’e hanaran governu konstitusional daualu tanba governu ne'e estadu no povu Timor-Leste nian.

"Opozisaun defaktu ko'alia governu defaktu, ha’u sadik see mak iha ne'e hakarak debate ho ha’u kona-ba konstituisaun."

Nia dehan, FRETILIN mai viabiliza governu konstitusional daualu atu servi povu la'os governu partidu ida nian.

"Governu la'os partidu nian tuir prinsipiu Konstituisaun, la'os hanesan imi bongkar pasang, prinsipiu FRETILÍN hakarak governu to'o rohan," dehan Bianco.

Rate this item
(5 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items