Deskonfia MSSI Lakohi Uza Karreta Estadu, Aluga Fali Karreta ba Fahe Subsidiu

Vise PM e Ministra MSSI, Armanda Berta dis Santos ko'alia ba jornalista sira iha Palsiu Governu foin lalais ne'e Vise PM e Ministra MSSI, Armanda Berta dis Santos ko'alia ba jornalista sira iha Palsiu Governu foin lalais ne'e Foto Tempo Timor

Tempotimor (Dili)-Maske governu iha karreta naton atu fasilita ekipa MSSI tuun ba kada suku hodi halo pagamentu subsidiu, maibé MSSI hili liu atu aluga karreta husi kompaña privadu balun.

Tuir informasaun husi fonte www.tempotimor.com katak, karreta ne’ebé MSSI presiza atu tula ekipa tuun ba suku hamutuk 452 no Primeiru Ministru Taur Matan Ruak orienta atu rekolla karreta husi kada ministériu hodi bele ajuda fasilita ekipa MSSI.

Ikus mai, konsege rekolla karreta governu hamutuk 350, maibé MSSI deside hodi utuliza de’it karreta 150 husi karreta 350 ne’ebé preparadu, no MSSI aluga fali karreta hamutuk 302 husi kompaña privadu tolu (3).

“Karreta ne'e ami presiza hamutuk 452. Govemu tuir orientasaun husi Primeiru Ministru rekolla karreta ministériu hotu-hotu ho total 350, maibé (MSSI) foti de'it mak karreta 150, depois foti fali husi kompania tolu,” dehan ofisial ida iha MSSI.

Tuir ofisial ne’e, maske prosesu tenderizasaun seidauk loke, maibé kompaña balun hatene ona no see de’it mak hakarak atu nia karreta MSSI aluga tenke liu husi sira-nia kompaña.

“Tender seidauk loke Senhor Im** (kompaña na’in) hatene tiha ona. Ema hotu-hotu nia karreta tenke ba tama hotu husi Señor Im** mak fornese mai (MSSI),” dehan nia.

Tuir fonte ne’e, desizaun ne’ebé MSSI foti hamosu duvidas, tanba MSSI hili liu atu aluga karreta ho folin $135 kada loron duke fó per diem $40 kada loron ba kondutór hodi lori karreta estadu tula ekipa MSSI.

“Agora ita aluga karreta ho folin dollar $135 mak di’ak ka ita fó per diem dollar $40 ba motorista ida durante loron 14 lori ne'e mak di’ak?,” dehan nia.

Tuir dadus, suku iha Timor Leste hamutuk 452 no governu deside uza de’it kareta estadu hamutuk 150 maske konsege rekolla kareta liu atus 300. Nune’e duni governu aluga fali kareta privadu husi kompania hamutuk 302, kada kareta, loron ida selu ho presu US$135. Tuir dadus ne’ebe iha presu aluga kareta kada loron ba kareta ida presu US$120.

 “Sira nia hanoin ne'e osan ida UNDP fo apoiu rihun $700 ne'e atu apoiu direita atu mai direita Ministeriu, maibe osan ne'e ba tiha Ministeriu Finansas mak tun fali mai, entau aproveita fali osan ida ne'e, entaun horseik kareta sira aluga ne'e dada aan, sira dada aan ida mak Raul, Santos no sira seluk tan.”

Hatan ba kestaun ne’e, Vise Primeira Ministra no Ministra Solidariedade Sosiál no Inkluzaun (MSSI) Armanda Berta dos Santos hatete, MSSI tenke aluga karreta tanba karreta ne’ebé governu oferese ba ekipa tekniku sira la to’o.

“Sim, karreta husi governu nian mak la to'o ne'ebé parte teknika mak haree par tuun ba apoiu ekipa sira ne'ebé tuun ba terenu halo pagamentu, tanba ne'e ha’u lakohi komenta," dehan Armanda bainhira hatan pergunta jornalista kona-ba tanba sa mak MSSI uza de’it karreta estadu 150 husi karreta 350 ne’ebé prepara.

Hatan kona-ba karreta hira mak MSSI aluga no husi kompaña ne’ebé, Armanda dehan, ida ne’e parte tekniku sira mak hatene.

 

NB : Tempo Timor Husu deskulpa tan ba ami komete erru iha hakerek numeru presu ba kareta kada loron. Ami nia intensaun lolos ne'e US$135 la'os US$180. Nune'e mos husu deskulpa ba erru erru ne'ebe mosu iha paragrafu sia iha artigu iha leten ne'e. 

Rate this item
(3 votes)
Last modified on Thursday, 18 June 2020 11:24
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.