Desizaun MSSI hodi aluga karreta husi kompaña privadu balun maske karreta governu sufisiente hamosu preokupasaun no deskonfiansa balun. Aumenta tan ho jogadas iha MSSI laran, liu-liu ekipa MSSI ne’ebé hetan per diem $40 kada loron ba loron 14 maske balun halo de’it pagamentu iha loron rua to’o loron lima nia laran.

Funsionariu MSSI ida ne’ebé hola parte mós iha ekipa ba fahe subsidiu ne’ebé lakohi www.tempotimor.com públika ninia identidade, preokupa kona-ba espiritu poupansa governu, liu-liu MSSI iha prosesu pagamentu subsidiu ba uma-kain.

 “Ita ko'alia kona-ba poupansa, loos nu'udár Timor-oan obrigatoriu atu kontribui, maibé agora ita fó tiha ema nia per diem ba loron 14 no balun mai loron rua ou tolu de'it hotu tiha ona. Hanesan ha’u loron 14 osan simu tiha ona, maibé loron 5 de'it pagamentu hotu tiha ona, tuur haree de'it ona,” dehan fonte ne’e.

Nia dehan, iha suku ne’ebé nia ho nia kolega sira fahe subsidiu ba, remata ona iha Domingu (14/06) no daudauk ne’e sira halimar de’it iha uma.

"Domingu ami halo hotu tiha pagamentu. Segunda (15/06) ha’u fó tempu ba reklamasaun fixa ne'ebé karik balun lakon ka oinsa, maibé komu laiha buat ida, so iha de'it ha’u-nia suku ne'e mak na’in 11 la mai, maibé ne'e tanba rejistu iha Dili, prontu tiha hotu laiha ona, no osan restu $2.200 hatama fali ba konta bankaria suku nian, loron ne'e ha’u halo relatoriu hotu tuur de'it to'o mai agora, la halo buat ida," dehan nia.

Fonte ne’e hatete, per diem ba ekipa MSSI no koordenadór ekipa mós la hanesan. Per diem ba ekipa MSSI iha Dili ba loron 10, iha munisipiu seluk ba loron 14 ho valor $40 kada loron, no ba koordenadór ekipa per diem ba loron 20 ho valor $60 kada loron.

"Per diem ne'e fahe ba tolu, iha Dili simu loron 10, munisipiu loron 14 no kordenador sira simu loron 20.  Ha’u tama iha loron 20, ne'e kada loron ho osan $60 dollar, entaun kada munisipiu koordenador ida ema ida loron 20 hetan per diem $1.200 dollar."

Aleinde ne’e, nia preokupa mós kona-ba karreta ne’ebé MSSI aluga husi kompaña privadu sira.

"Agora problema mak karreta sira aluga ne'e loron 15 ona. Agora krareta ne'ebé ita aluga mós hanesan, aluga mais mina governu mak tau, depois aluga ho osan $135 dollar kada loron,” dehan nia.

Tuir nia, tanba MSSI aluga karun karreta ne’e, loloos bainhira prosesu pagamentu balun remata sedu, di’ak liu lori fila ona atu nune’e bele halo poupansa ba osan estadu nian.

"Kompania ne'e manan to'o nia kontaratu hotu, pelumenus sira ida halo pagamentu hotu ona iha loron rua ka tolu ne'e haruka fila ona par hakotu kontaratu hodi osan restu ne'e fila ba kofre estadu."

Fonte dehan tan, loloos governu iha karreta sufisiente atu bele tula ekipa MSSI sira hodi halo pagamentu, maibé bainhira karreta ne’e to’o mai, Diretór balun iha MSSI haruka fila no dehan katak karreta mak la to’o.

"Iha patrimoniu estadu ne'eba ne'e karreta balun estadu haruka mai no Diretor balun asina haruka fila hotu dehan fali karreta mak la to'o, ne'e lae, tanba karreta ne'e ajensia internasional sira mós haruka mai mais haruka fila hotu tiha,” dehan nia.

Tuir nia, hahalok ne’e la di’ak tanba iha tempu agora Timor-oan hotu, liu-liu sira ne’ebé serbisu iha instituisaun estadu, tenke esforsu atu salva netik osan estadu maske uitoan.

Entretantu, molok ne’e, tuir informasaun husi fonte www.tempotimor.com, karreta ne’ebé MSSI presiza atu tula ekipa tuun ba suku hamutuk 425 no Primeiru Ministru Taur Matan Ruak orienta atu rekolla karreta husi kada ministériu hodi bele ajuda fasilita ekipa MSSI.

Ikus mai, konsege rekolla karreta governu hamutuk 350, maibé MSSI deside hodi utuliza de’it karreta 150 husi karreta 350 ne’ebé preparadu, no MSSI aluga fali karreta hamutuk 302 husi kompaña privadu tolu (3).

“Karreta ne'e ami presiza hamutuk 452. Govemu tuir orientasaun husi Primeiru Ministru rekolla karreta ministériu hotu-hotu ho total 350, maibé (MSSI) foti de'it mak karreta 150, depois foti fali husi kompania tolu,” dehan ofisial ida iha MSSI.

Tuir ofisial ne’e, maske prosesu tenderizasaun seidauk loke, maibé kompaña balun hatene ona no see de’it mak hakarak atu nia karreta MSSI aluga tenke liu husi sira-nia kompaña.

“Tender seidauk loke Senhor Im** (kompaña na’in) hatene tiha ona. Ema hotu-hotu nia karreta tenke ba tama hotu husi Señor Im** mak fornese mai (MSSI),” dehan nia.

Tuir fonte ne’e, desizaun ne’ebé MSSI foti hamosu duvidas, tanba MSSI hili liu atu aluga karreta ho folin $180 kada loron duke fó per diem $40 kada loron ba kondutór hodi lori karreta estadu tula ekipa MSSI.

“Agora ita aluga karreta ho folin dollar $180 mak di’ak ka ita fó per diem dollar $40 ba motorista ida durante loron 14 lori ne'e mak di’ak?,” dehan nia.

 “Sira nia hanoin ne'e osan ida UNDP fo apoiu rihun $700 ne'e atu apoiu direita atu mai direita Ministeriu, maibe osan ne'e ba tiha Ministeriu Finansas mak tun fali mai, entau aproveita fali osan ida ne'e, entaun horseik kareta sira aluga ne'e dada aan, sira dada aan ida mak Raul, Santos no sira seluk tan.”

Hatan ba kestaun ne’e, Vise Primeira Ministra no Ministra Solidariedade Sosiál no Inkluzaun (MSSI) Armanda Berta dos Santos hatete, MSSI tenke aluga karreta tanba karreta ne’ebé governu oferese ba ekipa tekniku sira la to’o.

“Sim, karreta husi governu nian mak la to'o ne'ebé parte teknika mak haree par tuun ba poiu ekipa sira ne'ebé tuun ba terenu halo pagamentu, tanba ne'e ha’u lakohi komenta," dehan Armanda bainhira hatan pergunta jornalista kona-ba tanba sa mak MSSI uza de’it karreta estadu 150 husi karreta 350 ne’ebé prepara.

Hatan kona-ba karreta hira mak MSSI aluga no husi kompaña ne’ebé, Armanda dehan, ida ne’e parte tekniku sira mak hatene.