"Programa prioridade KKLN nia mak ida ne'e sei haree mós kona-bá verifikasaun dadus ne'ebé uluk halo hela, tanba orsamentu laiha to'o agora para hela," dehan Prezidente Aministrasaun KKLN Riak Leman ba jornalista sira, iha Palásiu Prezidensiál Bairro-Pite Díli, Segunda (22/06)
Nia mós dehan, prioridade seluk mak, sei halo koordenasaun ho Prezidente Komisaun Omenajen atu transfere dadus balun ba KKLN.
"Ida fali mak ami agora iha koordenasaun manas hela ho Prezidente Komisaun atu transfere atividade Komisaun Omenajen nian ba Konsellu hirak ne'e hotu," dehan Nia
Entretantu KKLN mós sei tun ba munisípiu hodi haree kona-bá preokupasaun veteranus sira nian iha munisípiu sira.
"Iha mós ezijénsia veteranus sira nian, entaun estrutura konsellu tenke tun ba munisípiu atu ko'alia buat ruma ho sira no haree mós kona-bá sede ba Konsellu Munisipaál sira, kona-bá transporte ba konsellu munisipál sira nian, inklui buat barak ne'ebé atu hala'o só ke orsamentu mak seidauk iha, bainhira orsamentu iha bele katuas mós ami book ona," dehan Riak Leman
Nia hatutan mos, veteranus falsu ka lae ne'e, KKLN lahatene, maibé KO mak hatene.
"Kona-bá veteranus ne'e la'ós veteranus mak falsu, iha ema mak falsifika dokumentus atu nia bele hetan osan, maibé kona-bá ida ne'e, ha'u seidauk bele ko'alia, tanba ami seidauk hala'o servisu kona-bá ida ne'e," dehan Riak Leman
Kona-bá deteta ema ne'ebé falsifika dokumentus ne'e Komisaun Omenajen mak hatene.
"Agora ne'e Komisaun Omenajen maka hala'o hela servisu kona-bá verifikasaun dadus, la hatene se António ka João mak falsifika nia dadus mós ita la hatene ne'e só sira maka bele hatene," dehan Nia.
Atu detekta ema ne'ebé falsifika dokumentu hodi sai veteranu, mak KKLN halo hela koordenasaun atu bele hetan mós atividade husi KO nian, bainhira sira entrega ona atividade Komisaun Omenajen nian ba Konsellu, ida ne'e mak KKLN foin hatene se maka falsifika, se mak bosok no se mak la bosok.