Tuir Deputadu bankada CNRT Gabriel Soares, iha pajina facebook, Mari Alkatiri hatete, asaun karidade ne’ebé Xanana halo nu’udar asaun ida hodi subar korrupsaun.
Tuir Gabriel, hanoin husi Alkatiri ne’e direitamente minimiza ona karidade ne’ebé la’os de’it Xanana halo, maibé mós Timor-oan tomak hala’o durante periodu estadu emerjensia.
"Ohin, Bankada CNRT hakarak responde Sekretáriu Jeral Partidu FRETILIN, Mari Alkatiri, ne’ebé ikus-ikus ne’e hatudu ninia frustrasaun agravada ba asaun karitativa ne’ebé Maun Boot Kay Rala Xanana Gusmão halo iha Dili no iha munisípiu sira," dehan Gabriel liu husi konferénsia imprensa iha sala bankada CNRT Parlamentu Nasionál, Kuarta (24/06).
Nia dehan, asaun frustasaun husi Alkatiri ne’e dezakredita no minimiza Timor-oan sira ne'ebé halo asaun karidade ba malu.
"Frustrasaun Mari Alkatiri nian ne’ebé soe iha facebook hodi dezakredita no minimiza Maun Boot no Timor-oan lubuk ida ne’ebé hala’o asaun karitativa hodi ajuda populasaun sira ne’ebé sofre hela ka falta aihán iha sira-nia moris lor-loron, hanesan konsekuénsia husi estadu emerjénsia," dehan Gabriel.
Aleinde dezakredita no minimiza asaun karidade Timor-oan sira, deputadu CNRT hatete mós katak, estatutu Alkatiri iha facebook mós nu’udar insultu boot ida ba igreja Katolika, Gabinete Prezidente Repúblika, no espoza Primeiru Ministru.
"Deklarasaun Mari Alkatiri nian ne’e, hanesan insultu boot ida ba Igreja Katólika, Gabinete Prezidente Repúblika, Espoza husi Primeiru Ministru no grupus karidade timoroan sira, ne’ebé durante ne’e halo hela asaun hodi fó tulun ba komunidade sira ne’ebé afetadas husi estadu emerjénsia," nia dehan.