Ministra Adaljiza Magno ho nia vizaun katak, sei kontinua de'it ho programa oitavu Governu Konstituisional nian, programa ne'ebé antes ne'e, Eis-Ministru Negósiu Estranjeiru no Kooperasaun Deonísio Babo Soares hala'o ona.
"Ha'u nia vizaun sei la ses husi programa oitavu Governu Konstituisional ninian ne'ebé eziste ona, purtantu ha'u sei ba kontinua de'it saida mak eskritu ka hakerek ona iha programa oitavu Governu Konstituisional no saida mak Governu halo ona", dehan Adaljiza ba jornalista sira, hafoin simu Pose, husi Prezidente Repúblika, iha Palásiu Prezidensiál Bairro-Pité, Kuarta (24/06).
Nia mos dehan, pontu hirak ne'ebé koloka atu dezenvolve iha Kooperasaun bilaterál, depende ba situasaun Covid-19 nia impaktu ne'ebé durante ne'e akontese.
"Antes atu koloka pontu importante sira ita haree fila-fali ba diplomasia pos Covid-19 ninian ne'e oinsá ou saida mak akontese ba kooperasaun bilaterál kada país no adezaun ba ASEAN, ita haree katak, situasaun Covid-19 ne'e sei diferente loos i ita sei la viajen arbiru no ema mos sei la mai arbiru, tan ne'e ita sei hein tempu barak hodi haree", Nia esplika
Nia parte sente orgullu, tanba bele hetan konfiansa husi Governu hodi lidera Ministériu Negósiu Estranjeiru no Kooperasaun.
"Konserteza ha'u orgullu tanba bele hetan konfiansa sai ministra purtantu husu mos ba ita hotu, atu suporta malu atu Governu ne'e bele susesu", Nia hakotu