Mudansa boot ba kargu iha governu konstitusional daualu mosu ba Partidu KHUNTO. Hahú husi Armanda Berta (Prezidente KHUNTO) ne’ebé “semo aas” hodi okupa kargu nu’udar Vise Primeira Ministra iha posse dahuluk ba membru governu na’in 8 hafoin mosu mudansa politika.
Iha pose daruak ba membru governu na’in 21, mosu mós mudansa boot ba membru governu husi partidu KHUNTO. Julião da Silva ne’ebé molok ne’e asume kargu nu’udar Sekretariu Estadu Formasaun Profisional no Empregu (SEFOPE) haksoit sa’e ba Vise Ministru Negosiu Estranjeiru.
Maske balun semo no seluk sa’e, maibé destinu oin-seluk mosu ba membru KHUNTO seluk, Joaquim José Gusmão dos Reis Martins, ne’ebé molok ne’e asume kargu nu’udar Ministru Agrikultura no Peskas (MAP) tenke tuun ba asume kargu nu’udar Sekretariu Estadu Protesaun Sivil (SEPS).
Kargu SEPS rasik husik hela istoria balun ba governu no partidu KHUNTO rasik. Molok ne’e, kargu SEPS ne’e okupa husi membru KHUNTO, Alexandrino Xavier Araújo, maibé nia tenke sai hafoin partidu KHUNTO rasik ezije atu nia rezigna an.
Ba kargu MAP ne’ebé Joaquim husik hela, sei okupa nafatin husi membru partidu KHUNTO, Pedro Reis.
Relasiona ho mudansa ba kargu Ministru ba Sekretariu Estadu, Joaquim José Gusmão dehan, kargu la importante, importante mak serví povu Timor-Leste.
"Ba ha'u, kargu saida de'it importante mak oinsa serví ita-nia povu. Tanba ne'e mak ha'u simu naha todan ida ne'e ho objetivu katak atu serví povu di'ak liu tán," dehan Joaquim iha Palásiu Prezidensiál Nicolau Lobato Dili, Kuarta (25/06).
Nia hatete, nia tuun husi kargu ministru hodi okupa fali kargu SE tanba kumpre desizaun partidu KHUNTO.
"Ha'u mai fali Sekretáriu Estadu tanba ida ne'e desizaun partidu nian, ne'ebé nomeia ha'u ba fali kargu seluk, mais ba ha'u la'ós kargu mak ha'u serví, maibé importante mak oinsa serví ita-nia povu," nia dehan.
Sekretariu Estadu ne’e hein katak, Ministru foun ne’ebé troka nia fatin iha Ministériu Agrikultura no Peskas sei halo serbisu ho di'ak.
"Governu ne'e, governu kontinuasaun, tanba ne'e ha'u iha konfiansa katak, ministru foun bele kontinua fali servisu ne'ebé iha. Ha'u apoiu tomak ba ministru nia servisu," dehan Joaquim.
