Segundu Komandante Operasionál SIJK Brigadeiru Jenerál João Miranda 'Aluc' relata, maski Estadu Emerjénsia remata maibé medidas prevensaun ba kombate Covid-19 kontinua aplika.
"Aban sesta (26/06) tuku 12:00 kalan Estadu Emerjénsia ba datoluk remata ona, tanba ne'e mak ami mai hasoru Governu ho komisaun interministeriál aprezenta relatóriu no ohin reuniaun interministeriál desidi la iha nesesáriu estende tan Estadu Emerjénsia, maibé ita nafatin foti medidas prevensaun ba Covid-19, tan ne'e, responsabilidade ida ne'e entrega fali ba Ministériu Saúde (MS)", dehan Aluc ba jornalista sira, hafoin reuniaun interministeriál, iha Palásiu Governu, Kinta (24/06).
Komandante Aluc mos dehan, maski Estadu Emerjénsia la estende ona maibé ba ema sira ne'ebé mai husi nasaun afetadu sira nafatin aplika medidas prevensaun Covid-19 nian, hanesan kumpri loron 14 iha kuarentena.
"Tuir medidas protokolares katak ema sira ne'ebé tama husi fronteira nafatin aplika tama kuarentena", tenik Nia
Nia akresenta, Estadu Emerjénsia ne'e remata, funsionamentu ba Sala Situasaun Sentru Integradu Jestaun Krize (SIJK) mos para ona no entrega fali kompeténsia ne'e ba Ministériu Saúde.